बाजुराके गर्जेगाड भिरसे ट्रक गिरके दुई जानेक मृत्यु
बाजुरा, २३ अगहन । बाजुरामे ट्रक दुर्घटना हुके दुई जानेक मृत्यु हुइल बा । बाजुराके पूर्वी उत्तरी भेगके जगन्नाथ गाउँपालिका–६ काप्रीमे रहल गर्जेगाड भिरसे विफेक सकारे ट्रक गिरके दुईके मृत्यु हुइल हो ।
मृत्यु हुइलमे बाँकेके ४२ वर्षीय मोहन जोशी ओ ताजाकोट गाउँपालिका–३ के विपी शाही रहल जुडडी प्रहरी चौकीके प्रमुख तथा प्रहरी नायब निरीक्षक वीरसिंह ठगुन्ना जानकारी डेलै ।
उहाँक डेहल जानकारी अनुसार नेपालगञ्जसे हुम्लाके लाग नेंगल भे १ ख ३४६८ नम्बरके मालबाहक ट्रक भीरसे करिब ५०० मिटर तरे गिरल बा । गाडी चालक ओ सहचालकके घटनास्थलमे मृत्यु हुइल ठगुन्ना बटैलै । मृतकके सनाखत हुइलेसेफे ओइनके शव परीक्षणके लाग कोल्टी प्राथमिक स्वास्थ्यचौकी नन्ना तयारी हुइटी रहल बा । दुर्घटनाबारेमे प्रहरी थप अनुसन्धान करटी रहल बटाइल बा । बाजुरामे पछिल्का समय सवारी दुर्घटना बढटी गैल बा ।
जिल्लामे एक हप्ता नइपुग्टी सवारी दुर्घटनामे परके पाँच जानेक ज्यान गैल बा । कलेसे २ जाने घाहिल हुइल बटै । वर्षामे बन्द हुइल सडक सुचारु हुइलपाछे सडक दुर्घटना हुइल जिल्ला प्रहरी कार्यालय बाजुराके प्रमुख प्रहरी नायव उपरीक्षक चतुर्भुज ओझा बटैलै । उहाँ सवारी दुर्घटना कम कैना विषयमे बिफेक रोज जिल्ला प्रशासन कार्यालयमे अन्तरक्रिया कार्यक्रमके आयोजना करल समेत बटैलै ।
