थारु नेता पार्टीके थारु कोटामे सिमिट !

आज अघन २४ से काठमाडौंके भृकुटीमण्डपमे नेपाली कांग्रेसके १४औं महाधिवेशन हुइटि बा । पार्टीके सब जिल्लाके महाधिवेशन प्रतिनिधि काठमाडौंमे गजागज भरल बाटैं । इहिसे पहिले ओहे ठाउँमे राप्रपाके महाधिवेशन निमज सेकल । ओस्हक एमाले फेन अम्हिक्के चितवनमे अपन १०औं महाधिवेशन निम्जा सेकल ।

महाधिवेशन प्रतिनिधिके सुचि हेरेबेर थारु नेता पार्टीके थारु कोटामे किल सिमिट हुइना अवस्ठा डेखाइटा, इ बर विडम्वनापुर्न अवस्ठा हो । ओस्हक प्रदेश कमिटि हेरि या जिल्ला कमिटि, ओहो कोटामे किल रना अवस्ठा बा । जस्टे कि नेपाली कांग्रेस सुदूरपश्चिम प्रदेशके कमिटि हेरेबेर झेली राना, राजसमझ चौधरी, भुलिया राना सब थारु कोटासे आइल बाटैं । आउर टे आउर थारु मधेसी नै हुइ कटि कटि वेदप्रसाद चौधरी मधेसी कोटासे सदस्य हुइल बाटैं । पार्टीके सुदूरपश्चिम प्रदेश उपसभापति जनकराज चौधरी फेन इहिसे पहिले थारु कोटासे जो महाधिवेशन प्रतिनिधि छनोट हुइल बाटैं । लुम्बिनी प्रदेशके मन्त्री डिल्लीबहादुर चौधरी फेन खुला, भुगोल ओर जाइ नै सेक्लैं, हुँखिन फेन थारु कोटासे जो महाधिवेशन प्रतिनिधि हुइना डगर सहजिल लग्लिन ।

एमालेके १०औं महाधिवेशनसे नेतृत्वमे आइल १२ जाने केन्द्रिय सदस्यमे ८ जाने थारु कोटासे आइल बाटैं । नारदमुनि राना अपने थारु कोटासे उम्मेदवारि डेना कहलमे थारु नेतन्से जो बिरोढ हुइलपाछे हुँखिन भुगोलओरसे प्रतिनिधित्व करागैल रहे । मने कञ्चनपुरके कृपाराम राना थारु कोटासे जो केन्द्रिय सदस्य बन्लैं । कैलाली, कञ्चनपुरमे एमाले कहि या कांग्रेस रानाहुँक्रे थारु कोटासे जो केन्द्र, प्रदेश, जिल्लामे प्रतिनिधित्व करल डेखाइल । ओहेसे अलग पहिचान रलेसे फेन रानाथारुहुँक्रे समग्रमे अपनहे थारुमे जो गन्ना चाहि कना गहन सन्देश फेन डेले बा पार्टीगत चुनाव ।

राप्रपाके महाधिवेशनमे थारु कोटा नै छुट्या गैल । इहिले अपवादके रुपमे फत्तेहसिंह थारु बाहेक कोइ केन्द्रिय सदस्यमे नैआइल । आदिवासी जनजाति कोटामे तामाङ, गुरुङके बर्चस्व बा । एकठो लिम्बूक् छावा राजेन्द्र लिङ्देन राप्रपाके केन्द्रिय अध्यक्ष हुइबेर थारु समुदायसे केन्द्रिय सदस्यमे फेन आइ नैसेक्ना विडम्वनापुर्न अवस्ठा रहल । इ अलग बाट हो कि महाधिवेशनपाछे चाहजौन दलके केन्द्रिय बैठकसे कुछ सदस्य केन्द्रिय सदस्यमे मनोनित हुइहिं । ओम्ने कुछ थारु नेता परे सेक्ठैं । मने का थारु आब मनोनितके अस्रामे किल रना या थारु कोटामे किल रना बठा बाँटल सिमिट राजनितिमे किल खुम्च्याइल रना हुइट ? इ आबक् जिउगर सवाल हो ।

जनकराज चौधरी, डिल्लीबहादुर चौधरी लगायट राष्ट्रिय राजनितिमे पहिचान बना सेकल नेतन् फेन थारु कोटा अगोरना हो कलेसे लावा पिढि कहिया आइ राजनितिमे ? ओहेसे थारु कोटाहे बल्गर बनैनाके संगसंगे खुला, भुगोलके कोटामे फेन अपनहे दावेदारके रुपमे बल्गर बनैना थारु नेतन् लागिट । थारु नेता अपन समुदायके लग किल नाहि, समग्र देशके अग्वा बनिट ।