सहमहामन्त्री ओ चार केन्द्रीय सदस्यमे थारु नेता सुनिश्चित
काठमाडौं, २५ अगहन । सत्तारुढ दल नेपाली काँग्रेसके १४ औं महाधिवेशनके दुसरा दिन आज मनोनयन दर्ताके काम हुइटी बा । महाधिवेशनमे थारु नेताहुक्रेफे होमल बटै । नेता विजयकुमार गच्छदार उपसभापतिके आकांक्षी रहल बटै ।
ओस्टेक और थारु नेतामे उमाकान्त चौधरी, तेजुलाल चौधरी, सुरेन्द्रप्रसाद चौधरी थारु कोटासे सहमहामन्त्री पदमे उम्मेदवारी डेना घोषणा करले बटै । बाँकी नेताहुक्रे केन्द्रीय सदस्यके दौडमे बटै । डा. गोपाल दहित, रामजनम चौधरी, योगेन्द्र चौधरी, नवोदिता चौधरी, जीवन राना लगायतके नेताहुक्रे चुनावी मैदानमे बटै । काँग्रेसभिटर टमान खेमा रहल ओरसे थारु नेताहुक्रे फे खेमाअनुसार उम्मेदवारी डेना बटैलै ।
काँग्रेस महाधिवेशनसे १३४ सदस्यीय केन्द्रीय कमिटी निर्वाचित करी । ओस्टेक, कोषाध्यक्षहे केन्द्रीय कमिटी बैठकसे चयन कैना काँग्रेसके वैधानिक व्यवस्था बा । ओस्टेक, काँग्रेसके महाधिवेशनमे सोम्मार २७ गते सकारे ८ बजेसे मतदान कार्यक्रम रहल उ दल जनैले बा ।
महाधिवेशनसे सभापति १, उपसभापति २, महामन्त्री २, सहमहामन्त्री ८ जाने निर्वाचित हुइही । ओस्टेक, खुला केन्द्रीय सदस्य ३५, महिला सदस्य ९, प्रदेशओरसे २१, दलितसे ९, आदिबासी जनजातिसे १५, खस आर्य १३, मधेसी ९, थारु ४, मुस्लिम ३, पिछरल क्षेत्रसे १, अल्पसंख्यक १, अपाङगता हुइलसे १ जाने निर्वाचित हुइही ।
काँग्रेसके विधानअनुसार १ जाने सहमहामन्त्री थारु कोटासे निर्वाचित हुइही । ओस्टेक, ४ जाने थारु कोटासे निर्वाचित हुइना सुनिश्चित पद हो । बाँकी सदस्यमे खुलासे, आदिवासी जनजाति कोटा ओ महिलासे थारु सदस्य निर्वाचित हुइना डगर खुला बा । थारु नेताहुकनके अनुसार काँग्रेस महाधिवेशनसे ढेरमे १२ से १५ जाने केन्द्रीय कमिटीमे थारु आई सेक्ना अनुमान करल बा ।
