आलोक मल्टी कन्सर्न प्रालि सञ्चालनमे
पहुरा समाचारदाता
धनगढी, २५ अगहन । धनगढी उपमहानगरपालिका–४, चटकपुरस्थित आलोक मल्टी कन्सर्न प्रालि सञ्चालनमे आइल बा । उद्घाटनके तयारीमे रहल आलोक मल्टी कन्सर्न गैल फागुन २२ गते आगलागी होके ध्वस्त हुइल ९ महिना ढिल सञ्चालनमे आइल हो ।
पुनः निर्माणपाछे सञ्चालनमे आइल अत्याधुनिक फर्निचर, फर्निसिङ तथा इन्टेइएर डेकोर उद्योगके आज सुदूरपश्चिम प्रदेशके मुख्यमन्त्री त्रिलोचन भट्ट एक समारोहके बीच उद्घाटन करलैं ।
उद्घाटन कार्यक्रममे उद्योगके प्रबन्ध निर्देशक भोजराज भट्ट छिमेकी मुलुक भारत, चीन ओ अन्य मुलुकसे नानल कच्चा पदार्थसे धनगढीमे अत्याधुनिक मेशिनके प्रयोग कैके फर्निचरके सामान उत्पादन करल बटैलैं । १० करोडके लगानीमे सञ्चालनमे आइल उद्योगमे अब्बे ८० जानेसे ढेर कामदार प्रत्यक्ष रोजगारी पाइल उहाँ बटैलैं ।
कार्यक्रममे प्रदेशके आन्तरिक मामिला तथा कानूनमन्त्री पूर्णा जोशी अइसिन उद्योग सञ्चालकहुकनहे प्रोत्साहन, सहकार्य ओ सहयोगके लाग प्रदेश सरकार तयार रहल बटैलि । कार्यक्रममे डडेल्धुरा अमरगढी नगरपालिकाके नगरप्रमुख विपिन ओझा, नेपाल उद्योग वाणिज्य संघके पूर्व केन्द्रीय सदस्य गोपाल हमाल, कैलाली उद्योग वाणिज्य संघके अध्यक्ष पुष्पराज कुँवर लगायत शुभकामना व्यक्त करले रहैं ।
आलोक मल्टी कन्सर्न प्रालिमे भोजराज भट्ट, हिरा जोशी, पदमबहादुर भण्डारी ओ आरिप अहमद राइमके लगानी रहल बा ।
