काँग्रेस सभापतिमे ६ जानेक उम्मेदवारी
पहुरा समाचारदाता
काठमाण्ठौ, २५ अगहन । नेपाली काँग्रेसके १४ औं महाधिवेशनमे सभापतिके लाग ६ जाने उम्मेदवारी दर्ता करैले बटै ।
शनिच्चर साँझ ५ बजेसम तोकल उम्मेदवारी दर्ताके समयमे शेरबहादुर देउवा, प्रकाशमान सिंह, डा शेखर कोइराला, विमलेन्द्र निधि, युवराज न्यौपाने ओ कल्याण गुरुङ सभापतिमे उम्मेदवारी दर्ता कराइल हुइट ।
ओस्टेक उपसभापतिमे ७ जाने मनोनयन दर्ता करैले बटै । उपसभापति पदमे पूर्णबहादुर खड्का, महेश आचार्य, सुजाता कोइराला, डा चन्द्र भण्डारी, धनराज गुरुङ, विजय गच्छदार ओ दिव्यश्री साह उम्मेदवारी दर्ता कराइल हुइट ।
ओस्टेक महामन्त्री पदमे डा. मिनेन्द्र रिजाल, गगन थापा, विश्वप्रकाश शर्मा, प्रकाशशरण महत, राजाराम कार्की ओ प्रदीप पौडेल उम्मेदवारी डेहल निर्वाचन समिति जनैले बा । ओस्टेक सहमहामन्त्री पदमे २० जानेक उम्मेदवारी परल बा । जेम्ने मानबहादुर विश्वकर्मा, बद्री पाण्डे, फर्मुल्लाह मन्सुर, सुरेन्द्र प्रसाद चौधरी, देवराज चालिसे, रञ्जीत कर्ण, रामकृष्ण यादव, कमला पन्त, तेजुलाल चौधरी, किशोर सिंह राठोर, विकास लामा, जीवन परियार, गंगा सुनार, महेन्द्र यादव, भीष्मराज आङ्दाङम्बे, जीवन बहादुर शाही, चेतराज बजाल, शेख वकिल, उमाकान्त चौधरी, डीना (महालक्ष्मी) उपाध्याय रहल बटै ।
ओस्टेक खुला केन्द्रीय सदस्य पदमे १०९ जानेक उम्मेदवारी परल बा । खुलाओर ३५ जाने निर्वाचित हुइनामे १०९ जानेक उम्मेदवारी परल निर्वाचन समितिके सदस्य तेज रावल जानकारी डेलै ।
देउवा टीममे के के परलै
काँग्रेस सभापति शेरबहादुर देउवा पक्षसे उपसभापतिमे विजयकुमार गच्छदार ओ पूर्णबहादुर खड्काहे उम्मेदवार बनैले बा ।
ओस्टेक महामन्त्रीमे प्रदीप पौडेल ओ प्रकाश शरण महतके नाम फाइनल हुइल बा । ओस्टेक करके देउवा टीमसे सहमहामन्त्रीमे जनजातिसे भीष्मराज आङ्देम्बे, दलितसे मानबहादुर विश्वकर्मा, मधेसीसे महिन्द्र यादव, खस आर्यसे किशोर सिंह राठौर, थारुसे उमाकान्त चौधरी, मुस्लिमसे फर्मुल्लाह मन्सुर उम्मेदवार रहना हुइल बटै । ओस्टेक पिछरल क्षेत्रसे जीवनबहादुर शाही ओ महिलासे डिना उपाध्याय सहमहामन्त्रीके उम्मेदवार टुङगो लागल एक नेता जानकारी डेलै ।
शेखर टीममे महामन्त्रीमे गगन ओ मिनेन्द्र
शेखर कोइराला टीमके उपसभापतिमे धनराज गुरुङ ओ चन्द्र भण्डारी, महामन्त्रीमे डा. मिनेन्द्र रिजाल ओ गगन थापा रहना करके पदाधिकारी टुंगो लगाइल रहे ।
सहमहामन्त्रीके उम्मेदवारमे खस आर्यसे देवराज चालिसे, पिछरल क्षेत्रसे बद्री पाण्डे, दलितसे जीवन परियार, महिलासे कमला पन्त, जनजातिसे विकास लामा, मधेसीसे रामकृष्ण यादव ओ थारुसे तेजुलाल चौधरी ओ अल्पसंख्यसे वकिल मियाँ उम्मेदवार बनल बटै ।
प्रकाशमान सिंहके प्यानलमे महामन्त्रीमे शर्मा
नेपाली कांग्रेसके प्रवक्ता विश्वप्रकाश शर्मासे नेता प्रकाशमान सिंहके प्यानलसे महामन्त्रीमे उम्मेदवारी दर्ता करैले बटै ।
पौडेल पक्षसे सभापतिके साझा उम्मेदवार छनोटमे सहमति नइजुटलपाछे नेता सिंह सभापतिमे अलग्गे उम्मेदवारी डेले बटै । उहाँक प्यानलसे उपसभापतिमे सुजाता कोइराला ओ महामन्त्रीमे शर्मा उम्मेदवारी दर्ता करैले बटै ।
प्रवक्ता शर्मा नम्मा समय सभापति शेरबहादुर देउवाके प्यानलमे रहल रहिट कुछ महिनाआघे महामन्त्रीमे उम्मेदवारी घोषणा करल शर्मा देउवा पक्षके प्यानलमे परे नइसेकलपाछे शेखर कोइरालाके प्यानलमे बैठना पहल करले रहिट ।
मने उ फे सम्भव नइहुइलपाछे उहाँ अन्तिममे सिंहके प्यानलसे महामन्त्रीके उम्मेदवार बनल हुइट ।
संस्थापन पक्षके प्रदेशसे प्रतिनिधित्व कैना केन्द्रीय सदस्यके उम्मेदवार
नेपाली कांग्रेसके संस्थापन पक्ष प्रदेशसे प्रतिनिधित्व करुइया ओ समावेशीओरके केन्द्रीय सदस्यके उम्मेदवार टुंग्यइले बा ।
प्रदेश १ से अमृत अर्याल (मोरङ), आनन्द सन्तोषी राई (धनकुटा) ओ महिलामे महिन्द्र लिम्बु (झापा) हे उम्मेद्वार रहल संस्थापन पक्षके एक नेता बटैलै ।
ओस्टेक प्रदेश २ से रमेश रिजाल (पर्सा), आनन्द ढुंगाना (धनुषा) ओ महिलामे चित्रलेखा यादव (सिरहा) उम्मेदवार बनैना निर्णय हुइल बा ।
बागमती प्रदेशसे ध्यानगोविन्द रञ्जित (काठमाडौँ), ध्रुव अधिकारी (नुवाकोट) ओ महिलामे उर्मिला केसी (ललितपुर) उम्मेदवार बन्ना हुइल बटै ।
गण्डकीसे ध्रुव वाग्ले (तनहुँ), सोभियतबहादुर अधिकारी (कास्की) ओ महिलामे सरस्वती तिवारी (स्याङ्जा), लुम्बिनीसे देवेन्द्रराज कँडेल (नवलपरासी पश्चिम), चन्द्र केसी (गुल्मी) ओ महिलामे शिला शर्मा खड्का (दाङ)हे उम्मेदवार बनैना निर्णय हुइल सभापति शेरबहादुर देउवाके सचिवालय जनैले बा ।
ओस्टेक कर्णालीमे कणर्बहादुर बुढा (डोल्पा), राजीवविक्रम शाह (जाजरकोट) ओ महिलामे जानकी सिंह (सुर्खेत) तथा सुदूरपश्चिम प्रदेश सदस्यमे डा. रणबहादुर रावल (कैलाली), यज्ञराज जोशी (कञ्चनपुर) तथा महिलामे सुशीला भट्ट (कैलाली) हे उम्मेदवार बनैना हुइल बा ।
प्रदेशसे दुई पुरुष ओ एक महिला केन्द्रीय सदस्य बन्न प्रावधान विधानमे बा ।
ओस्टेक मुस्लिम कोटाके केन्द्रीय सदस्यमे अब्दुल रज्जाक (रुपन्देही), अब्दुल सतार (गोरखा) ओ सुविदा खातुन (बर्दिया) हे उम्मेद्वार बनैना निर्णय हुइल बा ।
पिछरल क्षेत्रसे अर्जुनजंगबहादुर सिंह (बझाङ) हे उम्मेद्वार बनैना निर्णय संस्थापनसे करले बा ।
ओस्टेक अल्पसंख्यक कोटामे प्रदीप सुनुवार (ओखलढुंगा)हे उम्मेदवार बनैना निणर्य संस्थापनसे करले बा ।
अपाङगता कोटासे मदनकृष्ण श्रेष्ठ (भक्तपुर) हे उम्मेदवार बनैना निर्णय हुइल सभापति देउवाके सचिवालय जानकारी डेले बा ।
९१ वर्षीय कार्कीके केन्द्रीय सदस्यमे उम्मेदवारी
वीरगञ्जके उपमेयर शान्ति कार्की नेपाली कांग्रेसके केन्द्रीय सदस्यमे उम्मेदवारी डेले बटी ।
९१ वर्षीय कार्की महिला खुलाओर केन्द्रीय सदस्यमे उम्मेदवारी डेहल हुइट । स्वच्छ काग्रेस ओ महिला अधिकारके लाग अपने उम्मेदवारी डेहल उपमेयर कार्की बटैली । वीपीसे प्रभावित हुके काँग्रेसमे सक्रिय हुइल उहाँक कहाई बा ।
