नेकपा माओवादी केन्द्रके प्रदेशस्तरीय सम्मेलन सुरु
पहुरा समाचारदाता
धनगढी,२५ अगहन । नेकपा माओवादी केन्द्रके पहिल प्रदेशस्तरीय सम्मेलन धनगढीमे सुरु हुइल बा ।
देशके सातु प्रदेशमे एकसाथ सुरु हुइल अधिवेशन अध्यक्ष पुष्पकमल दाहाल ‘प्रचण्ड’ भर्चुअल माध्यामसे काठमाण्डौँसे उदघाटन करल हुइट । भर्चुअल उदघाटन समारोहहे सम्बोधन करटी अध्यक्ष प्रचण्ड पार्टीमे कमी कमजोरी रहल कहटी उहीहे सच्चाके क्रान्तिकारी पार्टीके रुपमे रुपान्तरण करे पर्ना दोसाँधमे रहल बटाइल हुइट ।
‘विश्वमे हमार केल पार्टी ओसिन ठाउमे बा जे विचारहे विकास कैना सम्भावनाफे बोक्ले बा । अब्बेफे चुनौतीके सामाना कैना आधारफे बोक्ले बा ओ क्रान्तिके नयाँ मोडलके खोजी करी, प्रचण्डके कहाई बा । उहाँ ओसिन नयाँ मोडल खोजे सेक्ना सम्भावना बोकल पार्टीफे माओवादी रहल बटैलै ।
उहाँ एमालेहे पञ्चर्यालीके संज्ञा डेटी भर्खर सम्पन्न एमालेके महाधिवेशनमे कौनो विचारके बहस नइकरके व्यक्ति पूजाके बाट करटी रहल बटैलै । उहाँ नेपाली काँग्रेसके महाधिवेशनफे हेरटी रहल कहटी राष्ट्र कैसिन बनैना कना ओर काँग्रेसमेफे बहस नइहुइल बटैलै ।
धनगढी स्थित रिद्धिसिद्धि प्यालेसमे प्रदेश अधिवेशनके उदघाटन हुइल हो । आज अँटवार बन्द सत्र सुरु हुई । अधिवेशनमे प्रदेशके ९ ठो जिल्लासे ओ और करके १ हजार १ सय ९७ प्रतिनिधी सहभागी हुइल माओवादी केन्द्रके सुदूरपश्चिम प्रदेश इन्चार्ज खगराज भट्ट जानकारी डेलै ।
सम्मेलनसे ९ पदाधिकारीसहित २२३ (१० प्रतिशत मनोनित सहित) जानेक प्रदेश समिति चयन हुई । पदाधिकारी तथा सदस्यके आकांक्षी नेताहुक्रे गृहकार्यमे जुटल बटै । सेकटसम सहमतिमे नेतृत्व चयन कैना माओवादी केन्द्रके तयारी बा ।
माओवादी केन्द्रके सुदूरपश्चिम इन्चार्ज खगराज भट्ट नेतृत्व चयनके लाग सबसे पहिले सहमतिके प्रयास हुइना बटैलै । अन्तिम विकल्पके रूपमे केल लोकतान्त्रिक विधिमेफे जाई सेक्ना इन्चार्ज भट्टके कहाई बा । अधिवेशनसे नयाँ नीति ओ नयाँ सिद्धान्त नन्ना बटैटी उहाँ उहे अनुसार पार्टीके गतिविधीपाछे नयाँ तरिकासे सञ्चालन हुइना बटैलै ।
माओवादी केन्द्रके सुदूरपश्चिम प्रदेश अधिवेसनके डाक्टर केदार चन्द्र भट्टहे निर्वाचन समितिके संयोजक तोकल बा ।
के–के बटै प्रदेश अध्यक्षके आकांक्षी ?
सुदूरपश्चिममे हाल माओवादी केन्द्रके १३ जाने केन्द्रीय सदस्य बटै । १७५ जानेक प्रदेश आयोजक समिति बा कलेसे हाल १ हजार १४७ जाने प्रतिनिधि पालिका अधिवेशनसे छनोट हुके आइल बटै ।
केन्द्रीय सदस्यमध्ये हालके प्रदेश अध्यक्ष शरदसिंह भण्डारी (अछाम), नरेन्द्र कुँवर (बैतडी), प्रदेशसभा सदस्य समेत रहल वीरमान चौधरी (कैलाली), प्रदेश समिति सचिव नेपबहादुर चौधरी (कैलाली)फे अध्यक्ष बन्ना दौडमे रहल जनैलै बा । और फे प्रदेश अध्यक्षके दावेदार रहल जनैले बा । समाचार स्रोतके अध्यक्ष कैलाली पैना सम्भावना प्रवल रहल बा ।
प्रदेश समिति पदाधिकारीके लाग सबसे ढेर कैलाली जिल्लासे डेखल बटै । सबसे ढेर सदस्य रहल कैलाली जिल्लासे अध्यक्ष चयन करे पर्ना छलफलफे चल्टी रहल जनैले बा । सुदूरपश्चिममे माओवादीके ८८ हजार सदस्य रहल बटै । जौन मन्से सबसे ढेर कैलालीमे २८ हजार ५४३ जाने सदस्य बटै । २२३ सदस्यीय प्रदेश समितिमे १ जाने अध्यक्ष, ३ जाने उपाध्यक्ष, १ जाने सचिव, ३ जाने सहसचिव ओ १ जाने कोषाध्यक्ष करके ९ जाने पदाधिकारी चयन हुइही ।
माओवादी केन्द्रके अन्तरिम विधान २०७८ अनुसार बन्ना प्रदेश समिति समावेशी चरित्रके रही । ३५ प्रतिशत महिला, १५ प्रतिशत दलित, ५ प्रतिशत मुस्लिम ओ २० प्रतिशत युवाके प्रतिनिधित्व कराई पर्ना व्यवस्था बा ।
