काँग्रेसमे थारू नेता: सहमहामन्त्री कोटामे सीमित
केन्द्रीय सदस्यमे के–के बटै थारु उम्मेदवार ?
काठमाडौं, २६ अगहन । नेपाली काँग्रेससे पार्टी इतिहासमे पहिल बार हालके १४औं महाधिवेशनसे टमान क्लस्टरसे समावेशी ढंगसे पदाधिकारीसहितके केन्द्रीय कमिटी चयन करटी बा । यी क्रममे आठ सहमहामन्त्रीके पदसे केन्द्रीय सदस्यमे क्लस्टर छुट्याइल बा ।
खुला, महिला, भूगोल, दलित, आदिवासी जनजाति, खस आर्य, मधेसी, थारू मुस्लिम, पिछरल क्षेत्र, अल्पसंख्यक, अपाङगता कोटसे केन्द्रीय समितिके लाग महाधिवेशन प्रतिनिधि भिरटी बटै । तराईके एक भारी समुदाय थारू आदिवासी जनजातिसे अलग कोटा पैले बा । यम्ने थारूसे एक सहमहामन्त्री तथा पुरुष २ ओ महिला २ करके ४ केन्द्रीय सदस्यके कोटा छुट्याइल बा ।
क्लस्टर बिनाके पदाधिकारीमे भर विजयकुमार गच्छदारसे प्रतिस्पर्धा करटी बटै । उहाँ शेरबहादुर देउवाके प्यानलसे उपसभापतिमे उम्मेदवार बनल बटै ।
सहमहामन्त्रीमे दुई जाने
थारू कोटासे सहमहामन्त्रीमे सुरुमे तीन जानेक उम्मेदवारी परलेसेफे अन्तिम समयमे आके एक जाने उम्मेदवारी फिर्ता लेहदसंगे अब दुई जाने बीच प्रतिस्पर्धा हुइल बा । शेखर समूहसे तेजुलाल चौधरी (सप्तरी) देउवा समूहसे उमाकान्त चौधरी (बारा) प्रतिस्पर्धा करटी बटै । पर्साके सुरेन्द्रप्रसाद चौधरी सहमहामन्त्रीमे उम्मेदवारी डेलेसेफे अन्तिम समयमे आके उहाँ अपन उम्मेदवारी फिर्ता लेले बटै ।
देउवा समूहसे रामजनम चौधरी (कैलाली) के नाम सहमहामन्त्रीमे ‘फिक्स’ हुइलेसेफे अन्तिम अवस्थामे काटल रहे । कृष्णप्रसाद सिटौला अपन समूहके उमाकान्तहे सहमहामन्त्रीमे भाग मागलपाछे देउवा समूहके रामजनम ‘आउट’ हुइल रहिट । अन्ततः रामजनम केन्द्रीय सदस्यके उम्मेदवारमे खुम्चल बटै । उमाकान्त चौधरी सिटौलाके कोटासे बहालवाला खानेपानी तथा सरसफाई मन्त्री हुइट ।
१४औं महाधिवेशनमे १७३ जाने थारू महाधिवेशन प्रतिनिधि बटै । कैलालीसे सबसे ढेर २९ जाने थारू महाधिवेशन प्रतिनिधि रहल तथा विजयकुमार गच्छदारके आशिर्वाद रहल ओरसे रामजनम आफू सहमहामन्त्रीमे टिकट पैना ढुक्क रहिट । मने सिटौला गुटसंगके सहकार्यपाछे उमाकान्त चौधरी टिकटमे बाजी मरलै ।
थारू समुदायके जातीय संस्था थारू कल्याणकारिणी सभा (थाकस)से शुकके अबेर रात थारू महाधिवेशन प्रतिनिधिहुकनके भेला बोइल रहे । जेम्ने केन्द्रीय पदाधिकारी तथा सदस्यहुकनके आकांक्षीहुक्रे आ–अपन विचार राखल रहे । सुरेन्द्रप्रसाद चौधरी पार्टीमे अपन योगदान बहुट नम्मा हुइल तथा ढेर वर्ष जेलनेल भोगल ओरसे सहमहामन्त्रीके लाग उपर्युक्त हुइल जिकिर करल रहिट ।
उहोर शेखर पक्षसे उम्मेदवारी डेहल तेजुलाल चौधरीले देउवा एकजानेफे थारू समुदायके व्यक्तिहेफे उम्मेदवारी नइडेहल, राज्य पुनसंरचनाके क्रममे पश्चिमके कैलाली, कञ्चनपुरके थारू बस्ती कित्ताकाट करल ओरसे देउवा नेतृत्वसे थारूहुक्रे सचेत हुई पर्ना अभिव्यक्ति डेहल रहिट ।
केन्द्रीय सदस्यमे के–के बटै थारु उम्मेदवार ?
थारू कोटासे केन्द्रीय सदस्यमे ४ जाने चयन हुइना हुइलेसेफे दर्जन ढेर उम्मेदवार बटै । यम्ने योगेन्द्र चौधरी ओ पार्वती डीसी चौधरी (दाङ), डा. गोपाल दहित ओ मंगलप्रसाद चौधरी (बर्दिया), नवोदिता चौधरी (सुनसरी), कल्पना चौधरी ओ सुमित्रा थरुनी (मोरङ), गीता चौधरी ओ नमिता चौधरी (सप्तरी) देवीप्रसाद चौधरी (रुपन्देही) लगायत बटै । सहमहामन्त्रीके उम्मेदवारीसे ‘आउट’ हुइलपाछे रामजनम चौधरी ढेर सुरक्षित थारू कोटासे केन्द्रीय सदस्य उम्मेदवार हुइल बटै । ओस्टेक, पूर्वमन्त्री डा. दहितफे थारू कोटासे उम्मेदवार बटै ।
थारू कोटासे केन्द्रीय सदस्यके उम्मेदवार योगेन्द्र चौधरी कहलै, ‘बारबार मन्त्री हुसेकल नेता संघरीया खुला, भूगोल क्लस्टरसे अनि मौका नइपउइयाहे थारू कोटा छोरडेले हुइट ।
साभार: रातोपाटी
