व्यवसायमे असर, आवतजावत करुइयन् सास्ती

पहुरा समाचारदाता
धनगढी, २७ अगहन । धनगढी उपमहानगरपालिका–८, सेतोपुल ठेनसे मनेहरासमके सडक नाली निर्माणमे ढिलाई हुइलपाछे व्यावसायहुकनहे असर परल बा, कलेसे दैनिक आवतजावत करुइयन सास्ती भोगे परल बा ।

हुलाकी सडक अन्तर्गतके जिरो पोइन्ट क्याम्पस रोडमे सबसे ढेर असर परल व्यावसायीहुक्रे बटैले बटै । सडक दायाँबायाँके नाली निर्माणमे ढिलाई हुइलपाछे सटरमे व्यावसाय संचालन करुइया अपन दैनिक व्यावसायमे असर परल बटैले बटै ।

क्याम्पस रोडस्थित सरोज आयल आघे रहल ओम आशा अस्पातल प्रालि जैना डगर एक अठुवार आघे खोदल नाली नैबनाइल कारण बिमारीहुकन सास्ती भोगे परल प्रालिके सञ्चालक जगतराज चौधरी बटैलै ।

उहाँ कहलै, ‘अस्पातलके आघे एक अठुवार आघे बडवार खटहा बनागिल रहे, खटहा जैसके टैस बा, बिमारीहुकन अस्पतालमे अइना जइनाफे डगर नइहो । एम्बुलेन्समे विमारी अइलेसे ओइनफे नन्ना कर्रा बा ।’ अस्पताल कहलेक संवेदनशील रहलेसेफे सडक बनुइया ठेकेदारके ढिलाई करल कारण हाली डगर बने नइसेकल उहाँ कहलैं ।

नाली निर्माण करेक लाग नालीके पानी रोडमे फेकल कारण सडक हिल्यम्या हुके आवतजावत करुइयनहे सास्ती भोगे परल जीवन एग्रोभेटके संचालन जीवन चौधरी बटैलै । उहाँ कहलै, नाली बनाइक लाग खोदल करिब पन्ध्र दिनसे ढेर होगिल, निर्माण कम्पनी ढिलाई करटा, नेगुइया दुःख पाइटै, एकओर व्यावसायमे समेत असर परल बा । उ डगर हुइटी विद्यालय जैना विद्यार्थीहे समस्या परल उहाँ बटैलै ।

हुलाकी सडकके जिरो पोइन्टमे सबसे ढेर असर परल बर्खा इलेक्ट्रोनिक्सके प्रोपराइटर धनबहादुर राना बटैलै । उहाँ कहलै, करिब २० दिन हुइ लागल नाली निर्माण बने नइसेकल हो । सडक जम्मा हिल्ला केल बा, आइ चाहल ग्राहकफे दोकन हेरके लौटजैठै ।

ओम फोटो स्टुडियोके प्रोप्राइटर केशव चौधरी सडक हिलाके कारण अब्बे व्यवसाय शुन्य बनल बटैलै । उहाँ कहलै, विहानके विद्यार्थीके स्कुल जैना सरकारी कर्मचारीके अफिस ओ लौटन बेला सडक जाम हुइना करल बा । सडक पुरा हिला केल बा । हतार हतार करुइया रोजना दुर्घटनामे परठै, आवतजावत करुइयाटे सास्ती भोगटे मने हमार यहाँ चल्टु ग्राहकफे आई नइसेकल कारण हमार व्यावसायफे चौपट हुइल चौधरी बटैलै ।

नाली निर्माण कम्पनी करुइया ठेकेदार बाजुरे बुढामगर विद्युतके पोल सर्नामे ढिलाई हुइल कारण नाली निर्माणमे ढिलाई हुइल बटैलै । उहाँ कहलै, सडक किनारमे विद्युतके पोल परल बा । टेलिफोनके तार, टमान केवुलके तार टरे झरल कारण नाली निर्माणमे ढिलाई हुइल रहे, भर्खर सारके ओराइल बा । आब काम रफतारमे बह्री दुई चार दिनमे ढलाई हुके सक्कु काम ओराई ।

समयमे नाली निर्माण नैहुइल कारण दैनिक ट्राफिक जाम हुइटी रहल बा । कलेसे दुर्घटनाफे हुइटी रहल व्यावसायहुक्रे बटैले बटैठै ।