सामाजिक लेखा परिक्षण तथा परियोजनाके गतिविधिके अनुगमन
पहुरा समाचारदाता
कञ्चनपुर, २८ अगहन । मुक्त कमैया महिला विकास मञ्चसे सिमान्तकृत समुदायके लाग सामाजिक ओ आर्थिक शसक्तीकरण परियोजनाके सामाजिक लेखा परिक्षण तथा अनुगमन कैगिल बा ।
सोम्मारके रोज सरोकारवाला निकायके सहभागितामे सामाजिक लेखा परिक्षण तथा परियोजनासे संचालन करल गतिविधिके अनुगमन कैगिल हो ।
मुक्त कमैया महिला विकास मञ्च फिन चर्च एड नेपालके सहयोगमे कैलालीके तीन ओ कञ्चनपुरके एक स्थानीय तहमे स्थानीय महिला नेतृत्व करल सहकारीके क्षमता अभिवृद्धि हुके सहकारीसे विनाधितो ऋण सुविधा पैनाके साथे बचतमे बृद्धि हुइना ओ सिमान्तकृत समुदायके महिलाके प्राविधि ओ व्यावसायिक शिक्षासे आम्दानीके स्रोतमे पहुँच पुग्न मेरिक कार्यक्रम करटी आइल बा ।
सामाजिक लेखा परिक्षण कार्यक्रममे मुक्त कमैया महिला विकास मञ्चके कार्यक्र संयोजक इन्द्र चौधरी स्थानीय महिला नेतृत्व करल सहकारीके क्षमता अभिवृद्धि कार्यक्रमसे २५ प्रतिशत समुह सदस्यके गरिबीके रेखासे हटना, समुहके सदस्यहुकनके आम्दानीमे २० प्रतिशत बृद्धि हुइना, ९० प्रतिशत सहकारीके सदस्यहुक्रे २ डलर मासिक बचत कैना सफल हुइना, ३० प्रतिशत सहकारीके सदस्य विना धितो ऋण लेके छोट व्यवसाय संचालन करे सेक्ना, चार मेरिक बचत कार्यक्रम संचालनके लाग क्षमता विकास जनैलै ।
सिमान्तकृत समुदायके महिलाके प्राविधि ओ व्यावसायिक शिक्षासे लक्षित घरधुरीके ४० प्रतिशत सदस्यके व्यवसाय संचालन सीप अभिवृद्धि हुइना, १०० जाने लक्षित घरधुरीक सदस्यसे नयाँ व्यवसाय स्थापना कैना ओ २ ठो वकालत योजनासे लक्षित सदस्यके सवालहे सम्बोधन कैना कार्यक्रम संयोजक बटैलै ।
मञ्चसे गोदावरी ओ शुक्लाफाँटा नगरपालिकामे ३ महिने डकर्मी तालिम, ६ महिने मोटरसाइकल मर्मत तालिम संचालन, ५ महिने कटाई सिलाई तालिम, लोकल मुरगी पालन मिनि ह्याचरी सहयोग, घर बगैचा प्रवद्र्ध सहयोग कार्यक्रम, व्यावसायिक तरकारी खेतीके लाग सहयोग, धानखेतीके लाग सिचाई सहयोग कार्यक्रम करल रहे ।
गौरीगंगा नपा, कैलारी, गोदावरी ओ शुक्लाफाँटा नगरपालिकामे मुक्त कमैया ओ सिमान्तकृत बालिकाहुकनहे छात्रवृति सहयोग, टट तालिम, ६ महिने रिफलेक्त कक्षा संचालन, लैङिक हिंसा ओ समानताके लाग चेतना मुलक कार्यक्रम संचालन, मुक्तकमैया ओ सिमान्तकृत समुदायके हक अधिकार लाग प्रदेश सरकार विच अन्तरक्रिय कार्यक्रम, प्रदेश स्तरीय कमैया मुक्ती दिवस मनैना,प्रदेश सरकारहे त्रैमासिक रुपमे ज्ञापन पत्र प्रदान कैना, राहत सहयोग, बंगुर सहयोग ओ ३ जनहनहे बाँस सहयोग करल कार्यक्रम संयोजक बटैलै ।
सामाजिक परिक्षण कार्यक्रममे उहाँ आर्थिक बर्ष २०७७/२०७८ के कार्यक्रम बजेट ४ लाख ९६ हजार २ सय २१ रहलमे ७ लाख ७४ हजार ७ सय ८ रुप्या खर्च हुइल जनैलै ।
कार्यक्रममे मञ्चके जिल्ला अध्यक्ष कौशिला चौधरी, शुक्लाफाँटा नगरपालिकाके कृषि शाखा, पशु शाखाके प्रमुख लगायत सुझाव डेहल रहिट । कार्यक्रम समापन शुक्लाफाँटा नगरपालिका–१२ के वडा सदस्य पार्वती भाट करले रहिट । ओस्टेक शुक्लाफाँटा नगरपालिका–१ बैशाखा गाउँमे परियोजनासे संचालन करल गतिविधिके अनुगमन करल रहे । अनुगमन कार्यक्रममे नगर उपप्रमुख कौशिला भाट, योजना शाखाके प्रमुख, विषयगत शाखाके प्रमुख लगायत सहभागिता रहल रहे ।
