कबड्डी बिजेता टोलीहे सम्मान
पहुरा समाचारदाता
कञ्चनपुर, २८ अगहन । राष्ट्रिय महिला कबड्डी प्रतियोगिता २०७८ के उपाधि जितल सुदूरपश्चिमके महिला टोलीहे कञ्चनपुरमे स्वागत ओ सम्मान करल बा ।
मंगरके महेन्द्रनगरके कवर्डहलमे विजयी टोलीहे जिल्ला कबड्डी संघ कञ्चनपुर सम्मान करल हो । अगहन २३ गतेसे २५ गतेसम धनुषा जिल्लाके बटेश्वर गाउँपालिकामे सप्पन्न राष्ट्रिय कबड्डी प्रतियोगितामे सुदूरपश्चिमके टीम १ लाख ५०५ नगदसहित उपाधि जितल रहे ।
जिल्ला कवड्डी संघ कञ्चपनुरके अध्यक्ष महेश चन्दके अध्यक्षतामे भीमदत्त नगरपालिका–४ के वडाध्यक्ष लक्ष्मीदत्त बोहराके बर्का पहुनाइमे उपाधी बिजेता खेलाडीहे माला, खादा ओ टिका लगाके सम्मान करल हो ।
प्रतियोगितामे बेष्ट रेडर ओ म्यान अफ दि म्याचके पुरस्कार सुदूपश्चिमके खेलाडी सुनिता थापा पैले बाटी । बेष्ट डिफेन्डरके पुरस्कार फेन सुदूरपश्चिमके खेलाडी निशा बोहरा पैले बाटी ।
कार्यक्रममे कञ्चनपुर ब्याटमिन्टन संघके अध्यक्ष मिनराज भट्ट खेलाडीहुक्रनहे १५ थान जर्सी प्रदान करल रहिट । भागेश्वरी फेन्सीके संचालक समेत रहल भट्ट खेलाडीहुक्रनके हौसलाके लाग जर्सी प्रदान करल बटैलै । सम्मान कार्यक्रममे समाजसेवी लिलाध्वज बस्नेत उपाधि जितल खेलाडीहुक्रनहे बधाई डेटी खेलाडीहुक्रनहे अन्तराष्ट्रिय क्षेत्रमे फेन सफलताके कामना डेलै ।
कञ्चनपुर कबड्डी संघके जिल्ला अध्यक्ष महेश चन्द, वडा नम्बर ४ के अध्यक्ष लक्ष्मी बोहरा खेलाडीहुक्रनके जितल उपाधि कञ्चनपुर जिल्लाके किल नैहोके सुदूरपश्चिमके नाउँ रोशन करलमे आभार व्यक्त कैटी खेलाडीहुक्रनहे थप सफलताके कामना करल रहिट ।
