चोरी कैटी रहल अवस्थामे चारजाने पक्राउ
पहुरा समाचारदाता
धनगढी, २८ अगहन । कैलालीमे चोरी कैटी रहल अवस्थामे प्रहरी चार जनहनहे पक्राउ कैले बा ।
मंगरके सकारे करीब तीन बजेक समयमे धनगढी उपमहानगरपालिका–१, कैलाली पुल लग्गे उग्रतारा ट्रेडिङ हाउसमे ताला टुरके चोरी कैटी रहल अवस्थामे चार जनहनहे पक्राउ करल प्रहरी जनैले बा ।
पक्राउ परुइयामे धनगढी उपमहानगरपालिका–१, शान्तिनगरके लोकेन्द्र सिंह सामन्त, उमेश कना आलोक चौधरी, बाजुरा बुढीगंगा नगरपालिका–८, बैठुइया विकास नेपाली ओ धनगढी उपमहानगरपालिका–१, शान्तिनगर बैठुइया विवेक साउँद रहल बाटै । उहाँहुक्रन विरुद्ध चोरी शीर्षकमे मुद्दा दर्ता कैके अनुसन्धान हुइटी रहल प्रहरी जनैले बा ।
ओस्टेक, कैलालीमे ठगी मुद्धाके फरार प्रतिवादी ७ बरसपाछे पक्राउ परल बाटै । जिल्लाके गोदावरी नगरपालिका ११ के ५६ बर्षीय पदम बहादुर बडैला पक्राउ परल हुइट ।
जिल्ला प्रहरी कार्यालय कैलालीसे खटल प्रहरी टोली उहाँहे पक्राउ करल हो । कैलाली जिल्ला अदालतसे २०७१ साल जेठ २५ गतेके फैसलासे एक महिना कैद ओ ७६ हजार जरिवाना सजाय तोकल रहे ।
उहाँहे लुकछुपके बैठल अवस्थामे घरसे पक्राउ करल पक्राउ करल जिल्ला प्रहरी कार्यालय कैलालीके प्रहरी नायब उपरीक्षक वेदप्रकाश जोशी जानकारी डेलै । पक्राउ पश्चात प्रहरी प्रतिवादी बडैलाहे मंगरके कैलाली जिल्ला अदालतमे पेश करल बा ।
