३ अर्ब ६० करोड कर्जा प्रवाह, १२ करोड २३ लाख मुनाफा आर्जन

पहुरा समाचारदाता
धनगढी, २८ अगहन । नवजीवन सहकारी संस्था लिमिटेड टमान शाखासे ४ अर्व १७ करोड निक्षेप संकलन करल जनैले बा ।

२८ बरस पुरा करके २९ औं बरसमे प्रवेश कैलक अवसरमे मंगरमे रोज आयोजित पत्रकार सम्मेलनमे अध्यक्ष चन्द्रबहादुर सिंह संस्थाके हाल ९ ठो शाखा, सेवा केन्द्र कार्यालय स्थापना हुके संचालनमे रहल ओ सक्कु शाखासे ४ अर्व १७ करोड निक्षेप संकलन हुइल जनैलै । संस्थासे टमान क्षेत्रमे ३ अर्व ६० करोड कर्जा प्रवाह हुइल उहाँ जनैलै ।

नवजीवन सहकारी संस्था सहकारी ऐन २०४८ अन्तर्गत २०५० बैशाख १५ गते सहकारी विभागमे दर्ता हुके संचालन हुइल मुलुकके अग्रणी सहकारी रहल अध्यक्ष सिंह बटैलै । यकर अधिकृत पुँजी ५० करोड, चुक्ता शेयर पुँजी २३ करोड ७९ लाख ओ शेयर सदस्य संख्या २६ हजार पुगल उहाँ जनैलै ।

संस्थासे आर्थिक वर्ष २०७८/७९ मे १२ करोड २३ लाख मुनाफा आर्जन कैना सफल हुइल ओ चालु आ.व के चार महिनामे संस्थासे रु १ करोड ७८ लाख संचालन मुनाफा आर्जन करल अध्यक्ष सिंह जनैलै । सस्थासे विगत १५ बरससे निरन्तर सहकारी ऐनसे तोकल अधिकतम सिमासम्म वार्षिक १५ प्रतिशत शेयर लाभांश प्रदान करटी आइल उहाँ जनैलै । १८ प्रतिशत लाभांश वितरण कैना उद्देश्य रहे मने कोरोना कारण लक्ष्यमे पुगे नइसेकल उहाँ जनैलै ।

बहुउद्देश्यीय सहकारी संस्थाके रुपमे दर्ता हुइल ओरसे बचत तथा ऋणके कारोवारके आलावा संस्थासे गोदावरी नगरपालिका–८, मजगाउँमे रहल अपन ढेड विगाहा जमिनमे करिब ५ हजार वर्गफिटके अत्याधुनिक गोदाम भवन निर्माण करके कृषि उपज धान, गोँहु स्टोर करटी आइल अध्यक्ष सिंह जनैलै । नेपाल सरकार घरेलु तथा साना उद्योग कार्यालयसे उ जमिनमे कुटानी पिसानी ओ पेलानी उद्योग संचालनके लाग स्वीकृत प्राप्त करसेकल ओरसे अइना समयमे नवजीवन खाद्य उद्योग संचालन कैना योजना रहल उहाँ जनैलै ।

संस्थाके उपाध्यक्ष डा. गोविन्दराज जोशी संस्थासे अपन शेयर सदस्यहुकनहे संस्थासे आपनत्व महशुस करके शेयर सदस्य हितकोष मार्फत औषधी उपचार खर्च, सुत्केरी खर्च, काजक्रिया वाफत सहयोग करटी आइल जनैलै । गत आव २०७७/०७८ मे सुत्केरी खर्च वार्फत २६ जनहनहे रु. ७८ हजार, औषधि उपचार खर्च ४० जनहनहे रु ७ लाख ९८ हजार, काजक्रिया खर्च ७२ जनहनहे रु १० लाख ८० हजार शेयर सदस्य हित कोषसे वितरण करल उहाँ जनैलै ।

शेयर सदस्य वा ओइनके गोसिया गोसिनीय, छावाछाईहुक्रे एसईई से स्नाकोत्तर सममे अध्ययनरत उत्कृष्ट नतिजा नन्ना छात्रछात्राहे नवजीवन पदकसे सम्मान करटी आइल उपाध्यक्ष जोशी बटैलै । संस्थासे सहकारी शिक्षा कोषसे अपन शेयर सदस्यहुकनहे शाखा÷सेवा केन्द्रमे जाके वित्तीय साक्षरता तालिम संचालन करटी आइल उहाँ जनैलै । संस्थाके टमान सेवा सुविधा उपलब्ध करैलेसेफे शेयर सदस्य सेवाबारे जानकारी नइलेहल उहाँ जनैलै ।

यी संस्थाके हाल धनगढी, टीकापुर, वाँसगढी बर्दिया, अत्तरिय, सुखड, जोशीपुर, आइवीआरडी कञ्चनपुर, राजपुर कैलाली, चौमालामे अपन शाखा÷सेवा केन्द्र मार्फत अपन शेयर सदस्यहुकनहे सेवा उपलब्ध करैटी आइल बा । कलेसे हसुलियामे सेवा केन्द्र संचालन कैना तयारी करले बा । संस्थासे दुई वर्षसे लघुवित्त कार्यक्रम संचालन करके सेवा प्रदान करटी आइल बा ।

संस्थासे विद्युतीय कारोवारहे प्रोत्साहन करेक लाग संस्थासे अपने मोवाइल एप ओ एटिएम सेवा प्रयोगमे नन्ले बा । नवजीवन सहकारी संस्थाके शाखा कार्यालय धनगढी ओ शाखा कार्यालय टीकापुर अपने भवनसे सेवा डेटी आइल बा । साथे सस्थासे प्रधान कार्यालय धनगढी ओ शाखा कार्यालय अत्तरियाकेके लाग अपने भवन निर्माण करसेकल बा । सुखड शाखा ओ जोशीपुर सेवा केन्द्रके लाग जमिन खरिद हुसेकल ओरसे अइना दिनमे अपने भवन निर्माण कैना योजना रहल संस्थाके उपाध्यक्ष जोशी जनैलै ।

सामाजिक उत्तरदायित्व अन्तर्गत सामुदायिक विद्यालय, टमान सामाजिक संघ संस्था तथा प्राकृतिक विपत्तिमे यी संस्थासे सहकारी विकास कोषसे आर्थिक तथा भौतिक सहयोग करटी आइल सस्था जनैले बा । संस्थाके २८ औ वार्षिकोत्सवके अवसरमे विद्यालयमे अध्ययनरत छात्रछात्राहुकनहे लक्षित करके निवन्ध प्रतियोगिता तथा हाजिरी जवाफ प्रतियोगिता सम्पन्न करले बा ।

संस्थासे वार्षिकोत्सवके अवसरमे बुद्धिचाल प्रतियोगिता, कर्मचारी विच व्याडमिन्टन प्रतियोगिता, म्यूजिकल चियर प्रतियोगिताफे करले बा ।२९ औं बरसमे प्रवेश कैलक अवसरमे आयोजित पत्रकार सम्मेलनक संचालन संस्थाके महाप्रवन्धक डम्मरसिंह गुरु करले रहिट ।