देउवा काँग्रेस सभापति पुनः निर्वाचित
काठमाडौं, २९ अगहन । काँग्रेसके १४ औं महाधिवेशनसे शेरबहादुर देउवा दोसर चो सभापति निर्वाचित हुइल बटैं । दोसर चरणके मतदानमे शेखर कोइरालाहे ८ सय ७८ मतसे पराजित कैटि उहाँ सभापति बनल हुइट् ।
सोम्मार हुइल मतदानमे कोइ फेन ५० प्रतिशत मत नाने नैसेकलपाछे ढेर मत नानल दुई जानेबीच मंरके रोज पुनः निर्वाचन कराके कांग्रेसके नेतृत्व चयन हरल हो ।
दोसर चरणमे देउवा २ हजार ७ सय ३३ मत नान्के निर्वाचित हुइल हुइट । मतदान अधिकृत सुनील पाण्डेके अनुसार ४ हजार ६ सय २३ मत गिलरमे प्रतिस्पर्धी कोइराला १ हजार ८ सय ५५ मत पैलैं । ३५ मत बदर हुइल । दिनके साढे ३ बजेसे रात साढे ९ बजेसम मतदान हुइलरहे । मंगरके रात सवा ११ बजे सुरु हुइल मतगणना बुधके बिहान करिब साढे २ बजे ओराइल रहे ।
पहिल चरणके निर्वाचनमे देउवा, कोइराला, प्रकाशमान सिंह, विमलेन्द्र निधि ओ कल्याण गुरुङ सभापतिके उम्मेदवार रहैं । ४ हजार ६ सय ७९ मत गिरलमे देउवा २ हजार २ सय ५८ (४८ दशमल २५ प्रतिशत), कोइराला १ हजार ७ सय २ (३६ दशमलब ३७ प्रतिशत), सिंह ३ सय ७१ (७ दशमलव ९२ प्रतिशत), निधि २ सय ५० (५ दशमलव ३४ प्रतिशत) ओ गुरुङ २२ (शून्य दशमलव ४७ प्रतिशत) मत नन्ले रहैं । ७६ मत बदर हुइल रहे । पार्टीके विधानअनुसार सभापति निर्वाचित हुइना गिरल मतके ५० प्रतिशतसे ढेर नानेपरठ ।
पाँचौं चो प्रधानमन्त्री चलैटिरहल देउवाके कांग्रेस नेतृत्वमे दोसर कार्यकाल सुरु हुइल हो । २०७२ फागुनमे सम्पन्न १३ औं महाधिवेशनमे उहाँ रामचन्द्र पौडेलहे पराजित कैके पहिलचो कांग्रेसके सभापति बनल रहैं । २०४८ के आठौं महाधिवेशनसे केन्द्रीय सदस्य बनल देउवा पहिलचो २०५७ माघके १० औं महाधिवेशनमे सभापतिमे प्रतिस्पर्धा करले रहैं ।
पोखरामे आयोजित उ महाधिवेशनमे तत्कालीन सभापति गिरिजाप्रसाद कोइरालाहे चुनौती डेटि उहाँ उम्मेदवारी डेले रहैं । ओहेबेला कोइराला ९ सय ३६ मत नान्के जिटलमे देउवा ५ सय ७ मतमे सीमित हुइल रहैं । आन्तरिक कलहके कारण देउवा २०५९ असारमे पार्टी विभाजन करटि नेपाली काँग्रेस (प्रजातान्त्रिक) स्थापना करलैं ।
२०६४ असोजमे पार्टी एकीकरण कैके ४० प्रतिशत हिस्सासहित वरिष्ठ नेताके हैसियतमा उहाँ कांग्रेसमे लौटलैं । ओकर तीन वर्षपाछे हुइल १२ औं महाधिवेशनमे उहाँ पुनः सभापतिमे उम्मेदवारी डेलैं । मने सुशील कोइरालासँग पराजित हुइलैं । उहाँक राजनीतिक जीवनमे एकीकृत कांग्रेस पार्टीके सभापति हुइना अवसर २०७२ मे किल जुरल । ५० प्रतिशत कटाइ नैसेक्के दोसर चरणमे पुगके उहाँ रामचन्द्र पौडेलहे पराजित कैके सभापति हुइल रहैं । देउवा २०५९ असारसे २०६४ असोजसम कांग्रेस (प्रजातान्त्रिक) के सभापति बनल रहैं ।
