सुदूरपश्चिमके ४१ प्रतिशत नागरिकहे कोरोना विरुद्धके खोप

पहुरा समाचारदाता
धनगढी, २९ अगहन । सुदूरपश्चिम प्रदेशमे हालसम १८ लाख ४५ हजार ३०२ जाने कोरोना विरुद्धके खोप लगैले बाटै । स्वास्थ्य मन्त्रालयके अगहन २४ गतेसमके तथ्यांक अनुसार गैल बरसके माघसे हासम उ संखयामे व्यक्ति कोरोनाविरुद्धके खोप लगाइल हुइट । अब्बेसम आठ लाख छ हजार ६४३ जाने पूर्ण मात्रामे खोप लगैले बाटै ।

पूर्ण मात्रामे खोप लगुइयाके संख्या ४१ प्रतिशत रहल मन्त्रालय जानकारी डेले बा । ओस्टके, पहिल डोज लगुइयाके संख्या १० लाख ३८ हजार ६५९ अर्थात ५३ प्रतिशत रहल जनाइल बा ।

पहिल मात्रा खोप लगुइयाके संख्या राष्ट्रिय औसतहे पार करले बा कलेसे पूर्ण मात्रामे खोप लगुइयाके संख्या राष्ट्रिय औसतसे कम रहल बा । इ प्रदेशमे १८ बरस उमेरसे उप्पर उमेर समूहके १९ लाख ४८ हजार ३८८ जनहनहे कोरोनाविरुद्धके खोप लगैना लक्ष्य राखल रहे ।

१८ लाख ४५ हजार ३०२ जनहनहे खोप लगाइलपाछे अबब एक लाख तीन हजार ८६ जनहनहे कोरोनाविरुद्धके खोप लगैना बाँकी रहल बा । सुदूरपश्चिम प्रदेशमे बाजुरामे पहिल डोज ५० हजार ८११ ओ पूर्ण डोज ३५ हजार ७८७ कैके हालसम ८६ हजार ५९८ जाने कोरोनाविरुद्धके खोप लगैले बाटै । ओस्टके, बझाङमे पहिल डोज ५० हजार ५११ ओ पूर्ण डोज ५१ हजार ५४ कैके एक लाख एक हजार ५६५ जाने खोप लगासेकल बाटै ।

ओस्टके, दार्चुलामे पहिल डोज ६५ हजार ३६४ ओ पूर्ण डोज ६३ हजार ८७५ कैके एक लाख २९ हजार २३९ जाने खोप लगैले बाटै । बैतडीमे ८८ हजार ९८२ जाने पहिल डोज ओ ७५ हजार ७९ जाने पूर्ण डोज कैके एक लाख ६४ हजार ६१ जाने खोप लगासेकल बाटै । डडेल्धुरामे ४० हजार ५९३ जाने पहिल ओ ३७ हजार ३७४ जाने पूर्ण मात्रा कैके ७७ हजार ९६७ जाने खोप लगाइल मन्त्रालयके तथ्यांकमे उल्लेख रहल बा ।

ओस्टके डोटीमे ५६ हजार ६७३ जाने पहिल ओ ५३ हजार १२० जाने पूर्ण डोज कैके एक लाख नौ हजार ७९३ जाने कोरोनाविरुद्धके खोप लगासेकल बाटै । अछाममे पहिल मात्रा ७३ हजार ९०९ ओ पूर्ण मात्रा ६४ हजार १८४ जाने कैके एक लाख ३८ हजार ९३ जाने कोरोनाविरुद्धके खोप लगैले बाटै ।

कैलालीमे पहिल मात्रा तीन लाख ४६ हजार १०५ ओ पूर्ण मात्रा दुई लाख ८८ हजार ९५३ कैके छ लाख ३५ हजार ५८ जाने खोप लगासेकल मन्त्रालय जनैले बा । कञ्चनपुरमे पूर्ण मात्रा एक लाख ३७ हजार २१७ ओ पहिल मात्रा दुई लाख २५ हजार ९९३ कैके तीन लाख ६३ हजार २१० जाने कोरोनाविरुद्धके खोप लगासेकल बाटै ।

पुस ४ गतेसे प्रदेशके नौ जिल्लाके १२ से १७ बरस उमेर समूहके बालबालिकाहे फाइजर ओ मोडर्ना खोप लगैना प्रदेशके सामाजिक विकास मन्त्रालय जानकारी डेले बा । कैलाली ओ डडेल्धुराके बालबालिकाहे फाइजर खोप डेना जनाइल बा । कञ्चनपुर, डोटी, अछाम, बझाङ, बाजुरा, बैतडी ओ दार्चुलाके बालबालिकाहे भर मोडर्ना खोप लगैना मन्त्रालयके प्रवक्ता नरेन्द्रसिंह कार्की बटैलै । सुदूरपश्चिममे हाल ७७ जाने सक्रिय संक्रमित रहल बाटै ।