रिकोभर परियोजनासे ३ हजार परिवारहे लाभ पुगैना

पहुरा समाचारदाता
हसुलिया, २९ अगहन । कोभिड–१९ से प्रभावित समुदायके लाग पुनरुत्थान परियोजना (रिकोभर) के कैलारी गाउँपालिका स्तरीय परियोजना अभिमुखीकरण तथा शुरुवाटी बैठक बुधके सम्पन्न हुइल बा ।

उ अवसरमे बेस कैलालीके संयोजक लक्ष्मण चौधरी परियोजनासे कोभिडके कारण जागीर गुमाके प्रवाससे घर लौटल दलित, सीमान्तकृतहुकनके क्षमता विकास ओ जिविकोपार्जनके लाग काम कैना बटैलै । परियोजनासे स्वास्थ्य ओ कृषि क्षेत्रहे जोरके काम आघे बढैना उदेश्य राखल संयोजक चौधरी बटैलै । लुथरन वल्र्ड फेडरेशन ओ बेस कैलालीके साझेदारीमे कैलालीके धनगढी उपमहमानगरपालिका, गोदावरी नगरपालिका ओ कैलारी गाउँपालिकामे सचालन हुइ लागल उ परियोजनासे तीन हजार घरधुरीहे प्रत्यक्ष लाभ पुगैना लक्ष्य लेहल बा । उदेश्य प्राप्तिके लाग जनचेतना विस्तार, कोभिड १९ ओ ओसिन महाकारीके व्यवस्थापनके क्षमता अभिबृद्धि, महामारीके सामना कैना स्वास्थ्य प्रणालीहे सबल बनैना क्रियाकलाप संचालन करजाई ।

कैलारीके चार वडामे कार्यक्रम संचालन कैना संयोजक चौधरी बटैलै । लुथरन वल्र्ड फेडरेशनके ‘.लक्ष्मी शाही स्वास्थ्य जोखिम ढेर रहल ओ रोजगारी गुमाइल समुदायहे लक्षित करके कार्यक्रम सचालन करे लागल बटैली । कैलारी गाउँपालिकाके प्रमुख प्रशासकीय अधिकृत खगेन्द्रराज जोशी पालिकासंगके समन्वयमे परियोजनासे आघे बढाई लागल ओरसे पालिकासे आवश्यक सहयोग हुइना बटैलै ।
कैलारी गाउँपालिकाके प्रवक्ता कमल चौधरी कोभिड १९ से ढेर समुदाय बाढसे समेत थप प्रभावित हुइल उल्लेख करटी समुदायके हितमे काम करे पर्ना बटेलै । कार्यक्रम सचालन कैलारी गाउँपालिकाके सूचना अधिकारी यगम कलेल करले रहिट ।