अध्यक्षमे फेरसे सापकोटा चयन
पहुरा समाचारदाता
मसुरिया, ३ पुस । सामुदायिक वन समन्वय समिति गौरीगंगाके अध्यक्षमे ओमप्रकाश सापकोटा चयन हुइल बटै । शुकके सम्पन्न हुइल १४ औं वार्षिक साधारण सभासे सापकोटाहे फेरसे अध्यक्षमे निर्विरोध चयन करल हो ।
१३ सदस्यीय समितिके उपाध्यक्षमे बिष्णुमाया जोशी समेत फुेरसे चयन हुईबेर सचिवमे नवीन बोहरा, कोषाध्यक्ष प्रेमकुमारी चौधरी ओ सह–सचिवमे बुधराम चौधरी चयन हुइल बटै । समितिके सदस्यमे क्रमशः मेखराम बिक, मानबहादुर चौधरी, नारायणप्रसाद शर्मा, मसराम चौधरी, रुपा चौधरी, दिपक जोशी, अंग कडायत ओ मोहन बिक रहल बटै ।
समितिके अध्यक्ष ओमप्रकाश सापकोटाके अध्यक्षतामे हुइल साधारण सभा तथा सार्वजनिक सुनुवाई कार्यक्रममे कार्यालय सचिव भिम सापकोटा बार्षिक प्रगति प्रतिवेदन तथा आर्थिक वर्ष २०७७/०७८ के बयालिस लाख सात हजार तीन सय त्रिपन्न रुपैयाँ बराबरके आयव्यय विवरण प्रस्तुत करले रहिट ।
साधारण सभाहे सम्बोधन करटी डिभिजन वन कार्यालय धनगढीके डिभिजन वन अधिकृत केशव पराजुली बसन्ता वन क्षेत्र प्राकृतिक सामाजिक तथा साँस्कृतिक रुपमे भरिपूर्ण रहल बटैले बटैै । पराजुली यहाँके वन वातावरणिय विविधताके संरक्षण तथा उपयोगमे समुदायके हितमे सहयोग कैना अपने तयार रहल बटैले रहिट ।
वनके संरक्षणमे समुदाय स्थानीय सरकार ओ सरोकारवाला निकाय सक्कुहुनके सहकार्य रहे पर्ना कहटी डिभिजन वन अधिकृत पराजुली वन संरक्षणके कार्यमे प्रोत्साहन ओ सकृयता पुर्वक काम कैना बटैले रहिट । सभामे गौरीगंगा साझेदारी वन समितिके अध्यक्ष बलबहादुर महता,सव डिभिजन वन अधिकृत सन्तोष ढुङगाना, नेपाली कांग्रेसके हुमराज सापकोटा, माओवादी केन्द्र गौरीगंगा अध्यक्ष देविदत्त कडेल,जसपा के भिम जैगडी लगायत मन्तव्य रखले रहिट । समितिके उपाध्यक्ष विष्णुमाया जोशी स्वागत करल कार्यक्रमके सञ्चालन नारायण प्रसाद शर्मा लामिछाने करले रहिट ।
समन्वय समितिमे कैलारी गाउँपालिकाके २,६,८ ओ ९ वडा मोहन्याल गाउँपालिकाके ५ नं वडा तथा गौरीगंगा नगरपालिकाके ४,५,७,८,९,१०, ओ ११ वडामे रहल ३६ ठो सामुदायिक वन उपभोक्ता समूह आवद्ध रहल बटै ।
