सुदूरपश्चिम प्रदेशमे संक्रमणदर घटल
पहुरा समाचारदाता
धनगढी, ३ पुस । सुदूरपश्चिम प्रदेशमे पछिल्का २४ घण्डामे कोरोना संक्रमण दर घटल बा ।
सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालय डोटीसे डेहल जानकारी अनुसार पछिल्का २४ घण्टाके रिपोर्ट अनुसार प्रदेशमे ठप २ जाने केल संक्रमित बटै । कलेसे पाँच जाने संक्रमण मुक्त हुइल बटै ।
७ सय ४६ जानेक स्वाब संकलन करके परिक्षण करे दुई जनहनमे कोरोना पोजेटिभ डेखल मन्त्रालय जनैले बा । ६ सय ९३ जाने एन्टीजेन परिक्षणमे सक्कु कोरोना निगेटिभ ओ ५३ जानेक परिक्षण करे २ जनहनमे पोजेटिभ डेखा परल बा । ओस्टेक शुकके ८ सय ८३ जानेक कोरोना परिक्षण हुई ६ जानेकमे संक्रमण पुइल रहे ।
ओस्टेक करके पछिल्का २४ घण्टामे देशभर १८९ जनहनमे कोरोना भाइरस संक्रमण पुष्टि हुइटी रहल बा । स्वास्थ्य तथा जनसंख्या मन्त्रालयके अनुसार ५,४८३ पीसीआर परीक्षणमे १५८ ओ २,५१४ एन्टिजेन परीक्षणमे ३१ जाने करके १८९ जनहनमे संक्रमण पुष्टि हुइल हो ।
कोरोना संक्रमणके कारण पछिल्का २४ घण्टामे २ जानेक मृत्यु हुइल बा कलेसे २५० जाने संक्रमणमुक्त हुइल बटै । हाल देशभर कोरोना भाइरसके सक्रिय संक्रमितके संख्या ५४२८ रहल बा ।
