टिना खेती कृषकहे सिंचाई समस्या

पहुरा समाचारदाता
धनगढी, ४ पुस । कैलालीके गोदावरी नगरपालिका–८, हरिनगरमे बैठटी आइल मुक्तकमैया मनिका चौधरी भर्खर टिना खेती सुरुवाट करले बटी । लैहर घरसे टिना कैना सीप सिखल उहाँ असौसे भर्खर व्यावसायिक रुपमे टिना करे सुरु करल बटैठी ।

‘टिना खेती कैना पहिलेसे सोच रहे । मने यहाँ सिंचाईके समस्या हुइल कारण सुरुवाट करे नइसेक्गिल रहे,’ उहाँ कहली, ‘असौसे आँट कैके सुरुवाट कैगिल बा । पहिल चो लगाइल टिना आश लग्टिक बा । मने अभिन बजारभर नइगिल हो ।’ लटरम्भ फरल टमाटर, ओ मिर्चा बारी डेखैटी उत्पादन डेखके हौसला बह्रल बा । सिंचाई सुविधा नइहुइलेसे दुसरा सिजनके टिना खेती कैनामे समस्या अइना उहाँ बटैठी ।

कमैया मुक्तिपाछे कैलालीके गोदावरी नगरपालिका–८, हरिनगरमे २०५७ सालसे बसोबास करटी आइल बस्तीके मुक्तकमैयाहुकन सरकार पाँच–पाँच कटठाके दरसे जग्गा उपलब्ध करैले बा । ओटरा जग्गामे लगाइल धान गोँहुसे खैना केल पुग्न मने घर खर्च चलाईक लाग नगदेबाली सुरुवाट करल मुक्तकमैया मनिका बटैठी । मनिका जस्टे उ बस्तीमे १० जाने मुक्तकमैयाफे अशौसे टिना खेती सुरुवाट करले बटै ।

हरिनगर बस्तीके मुक्तकमैया भल्मन्सा शुक्रबहादुर चौधरी भर विगत १५/१६ बरससे टिना खेती करटी आइल रहिट । सिंचाईके समस्या रहलेसेफे बजारके बहुट मजा सम्भावना रहल उहाँ बटैठै । उहाँ कहलै, ‘मै करिब ३ कटठामे टिना खेती करु एक सिजनमे ४० से ५० हजार रुप्याके टिना विक्री हुजाए । घर खर्च मजासे चलल रहे ।’ यी बरस बेमौसमी पानीके कारण टिना खेती नष्ट पारलपाछे टिना खेती हटाइल उहाँ बटैठै ।

‘हरिनगरमे टिना खेती एक सिजनमे केल करे सेक्ना अवस्था बा ।’ उहाँ कहलै, ‘पाछेसम पानी बरसलेसे कुलुवामे पानी रहल नइटे यी छेक पानी सुखजाइठ, चैत बैशाखमे आउर झने सिचाईके समस्या हुइठ ।’ सिंचाई संग्गे खानेपानीके समेट समस्या रहल भल्मन्सा शुकबहादुर बटैठै । उहाँ कहलै, हरिनगर बस्तीमे ६० घरधुरी बा । ओम्ने करिब १५/२० घर केल नल्का बा । नल्का गारेक लाग ५०/६० हजार रुप्या खर्च हुजाइठ । नल्का गारेक लाग कुवाँ खोदे परठ । चौध÷पन्ध दिन ओेम्ने लागठ, पाइन, नल्का सामान करके ढेर खर्च हुजाइठ ।’

गोदावरी नगरपालिकाके उपप्रमुख रत्ना कडायत खानेपानी टंक्की बनासेकल ओरसे हाली हरिनगर बस्तीसम खानेपानीके व्यवस्था कैना बटैठी । उहाँ यी बस्तीमे दिग बोरिङ गारके खानेपानीके व्यवस्थापनफे करे सेक्ना बटैठी ।

मुक्तकमैया महिला विकास मञ्च हरिनगरमे व्यावसायिक टिना खेती सुरुवाट करल १० जनहनहे विउ, हजारी, सिचाई थोपा, पोलिहाउस सहयोग करले बा । मञ्चके कार्यक्रम संयोजक इन्द्र चौधरी ६० घरधुरीहे टिना खेतीके सहयोग कैना कहलेसेफे १० जाने केल इच्छुक रहल ओरसे ओइनहे विउ, हजारी, सिचाई थोपा, पोलिहाउस सहयोग करल बटैलै । उहाँ कहलै, टिना खेती नइकरुइया उ बस्तीके नौ घरधुरीहे लोकल मुरगी पालनके खोर, ५ जनहनहे मिनि ह्चारीफे सहयोग करल बा ।’ मुक्त कमैया महिला विकास मञ्च फिन चर्च एड नेपालके सहयोगमे बस्तीमे सपोट करल उहाँ बटैलै ।