एभरेष्ट फुटवल टुर्नामेन्टके उपाधी सैनिकहे
पहुरा समाचारदाता
धनगढी, ४ पुस । कैलालीके अत्तरियामे सञ्चालित एभरेष्ट फुटवल टुर्नामेन्टके उपाधी सैनिक आवाशिय महाविद्यालय हात परले बा । शनिच्चर हुइल फाईनल खेलमे दुर्गालक्ष्मी नमुना माविहे पेनाल्टी सुट आउटमे पराजित करटी सैनिकसे उपाधी चुमल हो ।
सेमिफाईलनमे माउन्ट ओलिभ स्कुलसंग पराजित हुइल सैनिक आवाशिय महाविद्यालयसे माउन्ट ओलिभ प्रतियोगितासे अयोग्य ठहरलके बाहेृर हुूइलपाछे फाईनल खेल्न मौका पाइल रहे ।
सेमिफाईनल खेलमे खेलके नियम विपरित स्कुलसे बाहेरके खेलाडीहुकनहे खेलमे समावेश कराइल ओरसे टिमहे अयोग्य ठहराइल खेल संयोजक धर्मराज भट्ट जानकारी डेलै । उहाँ खेलके नियम अनुसारके खेलाडी नइहुके माउन्ट ओलीभहे खेलसे बाहेर करे परल बटैलै ।
शनिच्चर हुइल फाईनल खेल रोमाञ्चक बनल रहे । बहुट प्रतिस्पर्धात्मक फाईनल खेलके समयमे दुनु टिम बराबर २–२ गोल करलपाछे पेनाल्टी सुट आउट मार्फत विजेताके टुङगो लागल रहे । पेनाल्टी सुटआउटमे दुर्गालक्ष्मी नमुना माविहे ३–२ से पराजित करटी सैनिक उपाधी उचालल हो ।
उपाधी जिटलसंगे सैनिकसे नगद रु. १५ हजारके साथे ट्रफि, मेडल ओ प्रमाणपत्र प्राप्त करले बा कलेसे उपविजेता बनल दुर्गालक्ष्मी नगद रु. १० हजारके साथे ट्रफि, मेडल ओ प्रमाणपत्रमे चित्त बुझैले बा ।
ओस्टेक करके प्रतियोगीताके बेष्ट प्लेयर दुर्गालक्ष्मीके सुरेश रावल घोषित हुइलै कलेसे सैनिकके दिपेश साउँद बेष्ट किपर घोषित हुइलै । ओस्टेक दुर्गालक्ष्मीके प्रदिप मिजार प्रतियोगितामे सबसे ढेर गोल कैना बेष्ट स्कोरर बनेबेर प्रतियोगिताके राईजिङ प्लेयरके रुपमे सक्षम पाठशालाके एलिस ताम्राकार चुन्लै । ओइने सक्कुहुनहे नगद रु. १ हजार ५ सयके साथे ट्रफि, मेडल ओ प्रमाणपत्र प्राप्त करले रहिट ।
शनिच्चर प्रतियोगीताके समापन कार्यक्रमके आयोजना करके विजयी टिम तथा खेलाडीहुकनहे पुरस्कार वितरण करल रहे । एभरेष्ट एकेडेमीके व्यवस्थापन समितिके शेयरसदस्य बासुदेव जोशीके सभापत्विमे आयोजित कार्यक्रमके प्रमुख अतिथि गोदावरी नगरपालिका वडा नं. १ के वडाध्यक्ष शर्मानन्द भट्ट रहल रहिट ।
कार्यक्रममे टमान स्कुलके प्रतिनिधि, शिक्षक, विद्यार्थीके साथे स्थानीयहुकनके सहभागीता रहल रहे । समापन कार्यक्रमके सञ्चालन एभरेष्ट एकेडेमीके शिक्षक हेमराज भट्ट करले रहिट ।
अत्तरियामे रहल एभरेष्ट एकेडेमी, प्याब्सन गोदावरी नगरकमिटि ओ गोदावरी नगरपालिका – ३ मे रहल न्यू मालिका युवा क्लवसे संयुक्त रुपमे प्रतियोगिताके आयोजना करल रहे ।
