बर्दियाके बढैयातालसे बरघर ऐन नन्ना
पहुरा समाचारदाता
बर्दिया, ४ पुस । बढैयातालमे थारु समुदायके प्रथाजनित कानूनहे मान्यता डेटी स्थानीयस्तरमे समावशी विकासके लाग बरघर ऐनके मस्यौदा गाउँपालिकामे बुझाइल बा ।
बढैयातला गाउँपालिकाके ९ वडाके ३६ थारु गाउँके बरघरहुकनके भेलासे पारित करल मस्यौदा ऐन अँटवार गाउँपालिकाके उपाध्यक्ष दिपा कुमारी गौतम ओ प्रमुख कार्यकारी अधिकृत धर्मराज न्यौपानेहे हस्तान्तरण कैगिल बा ।
कानूनके मस्यौदा अधिकारकर्मी एवं संस्कृतिविद् सुशील चौधरीसे करल रहिट । २०७८ पुस ४ गते हुइल बरघर भेलामे बरघर मस्यौदा कानून बुझ्टी उपाध्यक्ष गौतम नेपाली समाज बहुजातीय बहुभाषिक ओ बहुसाँस्कृतिक हुइल ओरसे समुदायके परम्परागत विकास अभ्यासहे स्थानीय सरकारसे सम्मान करटी पालिकाके विकासके लाग कानूनतः परिभाषित करे सेक्लेसे विकासमे स्थानीय समुदायके अपनत्व बढ्नाके साथे विकाससे गति लेना बटैटी ऐन पारित करके नीति तथा बजेटकेफे व्यवस्था कैना बटैली ।
प्रमुख प्रशासकीय अधिकृत धर्मराज न्यौपाने प्रथा ओ परम्परा कानूूनके स्रोत रहल ओरसे थारु समुदाय बहुल समाजमे उ समुदायमे रहल मजा प्रथा ओ परम्पराहे आत्मसाथ करटी वैधानिक व्यवस्था कैना उचित हुइना, यी समावेशीताहे मलजल कैना बटैलै । यकर साथे बढैयाताल गाउँपालिकासे बरघर मस्यौदा कानून यिहे हिउँदे गाउँसभामे लैजैना प्रतिवद्धता जनैलै ।
अभियन्ता एकराज चौधरी बर्दियाके बारबर्दिया, बाँसगढी, मधुवन, ठाकुरबाबा नगरपालिकासे कानून पास करसेकल जानकारी डेलै । यकर साथे बढैयातालसेफे यिहे बाट कानून पास करके बरघरहुकनके हक, अधिकार सुनिश्चित कैना बाटमे आशावादी रहल बटैलै । मस्यौदाकार सुशील चौधरी मस्यौदा कानूनके प्रावधानबारे जानकारी करैले रहिट । वडा नं ६ के वडाध्यक्ष रामहरष थारु, वडा नं ७ के वडाध्यक्ष इन्द्रप्रसाद लुइटेल, वडा नं ९ के वडाध्यक्ष कान्छु थारु, वडा नं ८ के वडा सदस्य दुर्गा थारु गाउँ परिषदसे बरघर मस्यौदा कानून पारित कैना पहल कैना बटैलै ।
बरघर भेला पालिकास्तरीय बरघर संजालके अध्यक्ष परशुराम थारुके अध्यक्षतामे हुइल रहे । कलेसे संचालन मैगर सामुदायिक संस्था बरघर सहजकर्ता बिरबहादुर थारु करले रहिट । बरघरहुक्रे बरघरहुकनहे पालिकासे कानूनी मान्यता डेलेसे स्थानीय विकासके प्रभावकारी ढंगसे अगुवाई कैना बटैले रहिट ।
