महिला स्वास्थ्य स्वयम्सेविकाहे साइकल
पहुरा समाचारदाता
हसुलिया, ६ पुस । कैलालीके कैलारी गाउँपालिकामे रहल १२५ जाने महिला स्वास्थ्य स्वयम्सेविकाहुकनहे साइकल वितरण करल बा । चालू आर्थिक वर्षके कार्यक्रम अनुसार कैलारी गाउँपालिकाके कार्यालयसे ओइनहे साइकल डेहल हो । मंगर एक कार्यक्रमके बीच गाउँपालिकासे महिला स्वास्थ्य स्वयम् सेविकाहुकनहे साइकल हस्तान्तरण करले बा ।
गाउँपालिकाके अध्यक्ष लाजुराम चौधरी, उपाध्यक्ष लक्ष्मी सत्गौवा ओ प्रमुख प्रशासकीय अधिकृत खगेन्द्रराज जोशी साइकल हस्तान्तरण करलै ।
महिला स्वास्थ्य स्वयम्सेविकाके माग अनुसार ओइनहे साइकल डेहल स्वास्थ्य शाखा प्रमुख वीरेन्द्र सापकोटा बटैलै । ‘महिला स्वास्थ्य स्वयम्सेविकाहुक्रे जौनफे बेलामे गाउँघरमे खट्न करल कारणसे ओइनके सहजताके लाग साइकल डेहल हो’, उहाँ कहलै ‘साइकल ओइनके मागफे रहे ।’
स्वास्थ्य क्षेत्रमे सुधारके लाग महिला स्वास्थ्य स्वयम्सेविकाहुक्रे गाउँघरमे निःशुल्क रुपमे काम करटी आइल बटै । ग्रामीण क्षेत्रके स्वास्थ्य अवस्था सुधार हुइनामे ओइनके भारी भूमिका बा । गाउँघरमे डाक्टरके रुपमे परिचित महिला स्वास्थ्य स्वयम् सेविकासे नेपाल सरकारसे यातायात खर्चके नाममे मासिक पाँच सय रुप्या पैना करल बटै । ओस्टेक करके, पोशाक खर्च कहिके वार्षिक १० हजार रुप्या सरकारसे ओइनहे डेना करल बा । कौनो राष्ट्रिय अभियान सञ्चालन हुइलेसे ओम्ने खटल वाफत दैनिक चार सय रुप्या भत्ता डेना करल जनाइल बा ।
साइकल वितरण कार्यक्रममे वडा अध्यक्षहुक्रे कैलाशप्रसाद चौधरी, बालकृष्ण चौधरी, सन्तु चौधरी, प्रेम चौधरी, दुःखीराम कठरिया, योजना शाखा प्रमुख सन्तोषकुमार चौधरी लगायतके उपस्थिति रहल रहे ।
