घोडाघोडीमे साक्षरता अभियान
कैलालीके घोडाघोडी नगरपालिका वडा नम्बर ११ हे इहे सोमवार साक्षर वडा घोसना करगिल बा । वडा भिट्टर १५ से ६० बरसके उमेर समूहके ९५ प्रतिशतसे ढेर जनसंख्या साक्षर रहल पा गइल ओरसे वडाहे साक्षर घोसना कर गिलक हो । एक कार्यक्रमके बीच नगरपालिकाके उपप्रमुख प्रेमकुमारी थापा उ वडाहे साक्षर वडा घोसना करलि । स्मरन रहे, नगर साक्षर घोसना करना अभियान अन्तर्गत इहिसे आघे वडा नम्बर ३, ४, ५, ९ ओ १२ वडाहे साक्षर घोसना कर सेकल बा ।
एकठो कार्यक्रममे बरस डिन पहिले घोडाघोडी नगरपालिकाके मेयर ममताप्रसाद चौधरी अपन नगरपालिकाहे ‘शैक्षिक हब’के रुपमे चिनारी डेहैना भासन कर्ले रहिट । सायड उहे अभियान अन्तर्गत फेन अपन नगरपालिकाके वडाहे साक्षर घोसना कर्टि बाटैं ।
घोडाघोडीमे साक्षरता अभियान अभिन आढा बाँकि बा । एकदिन उहो पुरा हुइ । औरे पालिका फेन जरुर साक्षर घोसना अभियानमे जाइ । मने साक्षर घोसना किल बरा बाट नैहो । साक्षर हुइल मनैन् कसिक कर्लेसे ओइनके जानल ग्यान नैहेरैहिन, अक्षर नैबिस्रैहि इ प्रमुख चुनौति हो ।
अब्बे काठमाडौंके माइतीघर मन्डलामे नेपालगन्जके मधेशी महिला २ जने महिलन्के अनाहकमे ज्यान गैलमे ओइनके न्यायके लग धर्नामे बैठल बाटैं । ओइनके धर्ना बैठल फेन महिना दिन पुग्टि बटिन । मने धर्नामे बैठल बहुटहस महिला अशिक्षित रहिट । ओहेसे अप्कि धर्नामे बैठल बेला कापि, कलम सहित बैठल बाटै । अच्छर लिख्ना सिख्टि बाटै । अपन साइन कैना सिख्के दंग परल बाटै । यदि ओंए धर्ना कार्यक्रमके पाछे लिखकपह्रक छोरडिहि कलेसे पहिले सिख्लक माटिम मिलजैहिन ।
जस्टेक हर नैजोटट्सम ओकर फ्राह चम्चम नैहुइठ । ओस्टक जानल विद्या नैबेल्सलेसे उ ढिरेढिरे बिसरटि जाइठ । यकर लग ठाउँ ठाउँमे पुस्तकालय जरुरि बिल्गाइठ । वचत समुहके नाउँमे होए या अन्य, कम्टिमे अठवारमे एक फेरा पह्रना लिख्ना बाटाबरन बनैना अवस्ठा रना चाहि । महिला शिक्षाहे व्यवहारिक हुइना स्थानिय पोस्टा बन्ना चाहि, उहे पोस्टाके आधारमे कम्टिमे अठवारमे एक फेरा हुइलेसे फेन पह्रना लिख्ना बाटाबरन बन्ना चाहि । का यकर लग घोडाघोडी नगरपालिका कौनो गृहकार्य करटि बा ? नैहो कलेसे गृहकार्य करे । साक्षर घोसना अभियान किल बरा बाट नैहो ।
