कैलारीहे साक्षर गाउँपालिका घोषणा

गाउँपालिकामे स्मार्ट शिक्षाके सुरुवातः वीरमान

पहुरा समाचारदाता
हसुलिया, ७ पुस । थारु समुदायके बाहुल्यता रहल कैलालीके कैलारी गाउँपालिकाहे साक्षर गाउँपालिका घोषणा करल बा ।

साक्षर घोषणाके लाग उ गाउँपालिका मापदण्ड पूरा करलपाछे बुधके हसुलियास्थित दीपेन्द्र माध्यमिक विद्यालयमे एक समारोहके आयोजना कैके साक्षर गाउँपालिका घोषणा करल हो । १५ से ६० बरस उमेर समूहके व्यक्तिके साक्षरता प्रतिशत ९५ पुगलमे साक्षर घोषणा करे सेक्ना नेपाल सरकार मापदण्ड निर्धारण करले बा । कैलारी गाउँपालिकामे इ उमेर समूहके व्यक्तिके साक्षरता प्रतिशत ९८.६ पुगल शिक्षा शाखा प्रमुख गणेशप्रसाद मिश्र जानकारी डेलै । कैलालीमे साक्षर बन्ना पालिकामे कैलारी पाँचौ स्थानीय तह को ।

शिक्षा समन्वय समितिके अध्यक्षसमेत रहल कैलारी गाउँपालिकाके अध्यक्ष लाजुराम चौधरीके अध्यक्षतामे हुइल साक्षरता घोषणा कार्यक्रममा प्रदेश सभा सदस्य वीरमान चौधरी बर्का पहुना रहल रहिट ।

कार्यक्रममे उहाँ कैलारी गाउँपालिकाभिट्टर चरणवद्ध रुपमे शैक्षिक विकास हुइटी रहल बटैलै । गाउँपालिकाभिट्टर स्मार्ट शिक्षाके सुरुवात होसेकल उल्लेख कैटी चौधरी कोभिड–१९ शिक्षा क्षेत्रहे तहसनहस पारल अ‍ोरसे ढिउर चुनौतीपूर्ण अवस्थामे कैलारी गाउँपालिका साक्षर बनल बटैलै । उहाँ शिक्षाहे साझा बनाके यकर विकासमे सक्कु राजनीतिक दल लग्ना आवश्यक रहल उल्लेख करलै ।

ओस्टके, कैलारी गाउँपालिकाके अध्यक्ष चौधरी गाउँपालिकासे आब रोजगारी सृजना कैना मेरके शैक्षिक विकासमे जोड डेहल बटैलै ।
एमालेके जिल्ला सदस्य चन्द्रिकाप्रसाद चौधरी कैलारी गाउँपालिका साक्षर घोषित हुइना आपनमे उपलब्धी रहल बटै । ‘मने, हमार शिक्षामे आभिन फेन परिवर्तन आसेकल नैहो,’ उहाँ कहलै, ‘अवस्था पहिले जैसिन रहे, अब्बे फेन ओस्टे बा ।’

नेपाली काँग्रेसके कैलारी गाउँपालिका उपसभापति सोनुराम चौधरी कैलारी गाउँपालिका साक्षर हुइना स्थानीय सरकारसे करल एकठो महत्वपूर्ण कार्य रहल बटैलै । उहाँ विद्यालयमो व्यवस्थापन समिति ओ शिक्षकबीच द्वन्द्व डेखजैना करल उल्लेख कैटी उहीहे न्यूनीकरण कैना ओर ध्यान डेना आवश्यक रहल बटैलै ।

ओस्टके, माओवादी केन्द्र कैलारी गाउँपालिकाके अध्यक्ष बतासु चौधरी रोजगारी सृजना कैना शिक्षाके आवश्यकता रहल बटैलै । जनता पार्टीके केन्द्रीय सदस्य होरीलाल चौधरीले प्राविधिक शिक्षाहे जोड डेहे पर्ना औंल्याइल रहिट ।

कार्यक्रममे कैलारी गाउँपालिकाके उपाध्यक्ष लक्ष्मी सत्गौवा, प्रमुख प्रशासकीय अधिकृत खगेन्द्रराज जोशी, नौ वडाके वडा अध्यक्ष, टमान शाखाके प्रमुख, टमान विद्यालयके शिक्षक, विद्यार्थीके उपस्थिति रहल रहे । ओस्टके, साक्षर गाउँपालिका घोषणाके अवसरमे विद्यार्थी अतिरिक्त क्रियाकलापके प्रदर्शनीसमेत करल रहिट ।