न्याय मग्टी जानकी गाउँपालिकामे तालाबन्दी
पहुरा समाचारदाता
धनगढी, ८ पुस । कैलालीके जानकी गाउँपालिका ९ के २५ वर्षीय अर्जुन दासके हत्या प्रकरणमे संलग्नहे प्रहरी पक्राउ करे नैसेकल कहटी आन्दोलनमे उत्रल संघर्ष समितिसे बिफेक रोज जानकी गाउँपालिकामे तालाबन्दी करले बाटै ।
हत्यामे संलग्नहे आजीवन कारावास, मृतकहे शहीद घोषणा, मृतकके छाइछावाहे राहत ओ उच्चशिक्षाके ग्यारेन्टी, परिवारके सुरक्षालगायत ८ बुँदे माग राखके पीडित पक्षसे आन्दोलन कैटी गाउँपालिका बन्द कराइल हो । मंगर ओ बुधके टीकापुरमे विरोध प्रर्दशन करल उहाँहुक्रे बिफेक रोज जानकी गाउँपालिकामे तालाबन्दी कैनाके साथे गाउँपालिका कार्यालय घेराउ करल संघर्ष समितिके संयोजक ललित परियार जानकारी डेलै ।
विभत्स रुपमे हत्या हुइल अँठ्वार दिन पुग्लेसे फेन प्रशासन अपाराधीहे कानुनी दायरामे लाने नैसेकल कहटी पूर्व निर्धारित कार्यक्रम अनुसार तालाबन्दी करल उहाँ बटैलै । ओस्टके संघर्ष समितिसे गाउँपालिकाके सक्कु वडा फेन बन्द कराइल जनाइल बा ।
ओस्टके संघर्ष समितिसे काल्ह शुकके भुपेन्द्र बडुवाल ओ अर्जुन दासके न्यायके लाग कैलालीके लम्की क्षेत्रमे पूर्वपश्चिम राजमार्ग ओ लम्की बजार दिनभर बन्द कैना जनैले बा ।
पुस ३ गते शनिच्चरके रोज जानकी गाउँपालिका वडा नं. ९ मे रहल स्थानीय अमरावती सामुदायिक वनुवामे हाठगोर बाँधके नग्न बनाके शरिरसे कपार अलग कैके हत्या करल अवस्थामे अर्जुन दासके शव फेला परल रहे । उ कार्यमे संलग्न एक जनहनहे प्रहरी पक्राउ करले बा कलेसे औरे तीन जाने फरार रहल प्रहरी जनैले बा ।
अब्बे अर्जुनके शव घटना स्थलसे पोष्टमार्टमके लाग टीकापुर अस्पतालमे राखल बा कलेसे शवहे परिवार अब्बेसम नैबुझ्ले हुइट ।
