पञ्चवर्षीय योजनाके अवधारणापत्र स्वीकृत
पहुरा समाचारदाता
धनगढी, ७ पुस । सुदूरपश्चिम प्रदेश सरकारसे प्रथम पञ्चवर्षीय योजनाके संक्षिप्त अवधारणापत्र स्वीकृत करले बा ।
मुख्यमन्त्री तथा मन्त्रीपरिषदके कार्यालयसे बिफेक रोज बैठल मन्त्रीपरिषदके बैठकमे पेस करल आर्थिक बरस २०७८/७९–२०८२/८३ के संक्षिप्त अवधारणापत्रहे स्वीकृत करल हो ।
प्रदेश योजना आयोगसे तयार पारल उ अवधारणापत्रसे प्रदेशके समग्र विकासके लाग योजना बनैना सहयोग पुग्ना प्रदेश सरकारके प्रवक्ता तथा आन्तरिक मामिला तथा कानुन मन्त्री पूर्णा जोशी बटैली ।
ओस्टके उहे बैठकसे प्रदेशके दुई स्थानीय तहमे वडा थप कैना संघीय सरकारहे सिफारिस कैना निर्णय करले बा ।
बिफेक रोज बैठल मन्त्रिपरिषद्के बैठकसे अछामके रामारोशन गाउँपालिका ओ बझाङके मष्टा गाउँपालिकामे वडा विभाजन कैना संघीय सरकारहे सिफारिस करल आन्तरिक मामिला तथा कानुनमन्त्री पूर्णा जोशी जानकारी डेली ।
‘गाउँ सभासे निर्णय पारित होके आइल रहे । सक्कु प्रक्रिया पुगल ओरसे हम्रे संघीय सरकारहे सिफारिस कैना निर्णय कैले बाटी,’ उहाँ कहली, ‘रामारोशन गाउँपालिकामे अब्बे सात वडा रहल बा ।’
उ गाउँपालिकामे वडा विभाजन कैके १२ बनाजैना बा कलेसे नौ वडा रहल बझाङके मष्टा गाउँपालिकामे वडा विभाजन कैके ११ बनाजैना बा ।
ओस्टके आन्तरिक मामिला तथा कानुन मन्त्रालयके सिफारिसमे पेस हुइल अस्थायी रुपमे कर्मचारी दरबन्दी ओ फर्म नवीकरण कैना समयावधि ओ जरिवाना मिनाहा सम्बन्धमे फेन निर्णय हुइल बा ।
प्रदेश सरकारसे कुछ महिनाआघे सञ्चालनमे लानल प्रदेश राजपत्र छापाखानामे अस्थायी रुपमे कर्मचारी दरबन्दीके लाग निर्णय करल मन्त्री जोशी बटैली ।
‘छापाखानामे एक कार्यालय सहयोगी, प्राविधिकसहित तीन जाने कर्मचारी अस्थायी रुपमे भर्ना करजैना बा,’ उहाँ कहली ।
ओस्टके, प्रदेशमे रहल फर्म नविकरण नै हुइल ओरसे ओइनके म्याद थप कैके पाँच प्रतिशत जरिवाना राखिल उहाँ बटैली ।
