साथी शिक्षकहे जीवन उपयोगी सीप ओ आत्मरक्षा तालिम

पहुरा समाचारदाता
टीकापुर, ८ पुस । टीकापुरमे जीवन उपयोगी सीप ओ आत्मरक्षा तालिम सम्बन्धि १३ दिने रुपान्तरण तालिम सम्पन्न हुइल बा ।

बाल कल्याण संघ टीकापुर ओ वल्र्ड भिजन ईन्टरनेशनल नेपालके संयुक्त आयोजनामे हुइल एकिकृत बाल संरक्षण परियोजना अन्तर्गत रुपान्तरण तालिम कैलालीके ५ ठो पालिकाके किशोरकिशोरीहे समावेश करल रहे । टीकापुर, भजनी, घोडाघोडी, गौरीगंगा ओ कैलारी गापामे रुपान्तरण मोडलमे परियोजना सञ्चालन हुइटी रहल बा ।

स्थानीय पालिकाके समन्वयमे बाल कल्याण संघसे साथी शिक्षकहे छनौट कैके रुपान्तरण कक्षा संचालन कैटी आइल बा । तालिम प्राप्त साथी शिक्षकहुक्रे समुदायके किशोरकिशोरीहे यौन तथा प्रजनन स्वास्थ्य अधिकार, जीवन उपयोगी सीप, नागरिक सहभागिता, आत्मरक्षा सम्बन्धि कक्षा सञ्चालन कैना बाटै ।

किशोरावस्थामे अइना टमान शारीरिक, मानसिक, बौद्धिक ओ सामाजिक परिवर्तनहे बुझे नै सेकके इ मेरके परिवर्तनमे अभिभावकहुक्रनके उचित साथ ओ सहयोग नैपाके किशोरकिशोरी टमान जोखिमपूर्ण ओ संवेदनशील परिस्थितिके सामना कैना बाध्य हुइ परल बा । औरे ओर, समाजमे विद्यमान गलत धारणा, परम्परा, मूल्यमान्यता ओ सोचाइसे किशोर किशोरीके समग्र विकासमे असर पुगैले बा ।

इहे चुनौतीहे मध्यनजर कैके नेपाल सरकारसे किशोरकिशोरीके समग्र विकासके लाग आवश्यक सवालहे सम्बोधन कैटी उहाँहुक्रनके अधिकारके संरक्षण ओ सम्बद्र्धनके लाग “किशोर किशोरीके समग्र विकासके लाग राष्ट्रिय कार्ययोजना २०७०/७१–२०७४/७५” तयार कैके उ कार्ययोजनाके कार्यान्वयन आघे बह्राइल हो ।

उ कार्ययोजनामे समावेश करल टमान सवालमे किशोरकिशोरीके ज्ञान ओ सीप अभिवृद्धि कैना उद्देश्य अनुरुप ‘रूपान्तरण’ तालिम पुस्तिका तयार करल ओ उहे अनुरुप बाल कल्याण संघ टीकापुर ओ वल्र्ड भिजन ईन्टरनेशनल नेपालसे उक्त कार्यक्रम सञ्चाल कैटी आइल कार्यक्रम अधिकृत पदमराज भट्ट बटैलै ।