अत्तरियामे पुस २७ गतेसे प्रादेशिक महोत्सव
पहुरा समाचारदाता
अत्तरिया, ८ पुस । कैलालीके अत्तरियामे इ बरस महोत्सब हुइना हुइल बा । कोरोना महामारीके कारण विगत २ बरससे हुइ नैसेकल महोत्सव इ बरस भर हुइना हुइल हो । अत्तरिया उद्योग वाणिज्य संघ बिफेक रोज अत्तरियामे पत्रकार सम्मेलनके आयोजना कैके महोत्वसके बारेम जानकारी कराइल हो ।
‘समृद्ध प्रदेशके आधारः कृषि, पर्यटन ओ व्यापार’ कना मुल नाराके साथ इहे पुस २७ गतेसे माघ ९ गतेसम छैँठो संस्करणके सुदूरपश्चिम प्रादेशिक महोत्सव २०७८ के आयोजना करे लागल अत्तरिया उद्योग वाणिज्य संघके अध्यक्ष अशोक राज देवकोटा जानकारी डेलै ।
बिगत २ बरससे हुइ नैसेकल महोत्वसहे इ बरस भर निरन्तरता डेना निर्णय अनुसार छोट समयमे तयारी करे लागल उहाँ बटैलै ।
महोत्सवमे दर्शकहुक्रनके मनोरञ्जनके लाग रमाईलो मेला, बाल उद्यान, सुदूरपश्चिम प्रदेशके नवप्रतिभावान कलाकारके साथे राष्ट्रिय तथा स्थानीय कलाकारहुक्रनके प्रस्तुति रहना जनाइल बा । महोत्सवमे १ सय ५० ठो टमान मेरिक व्यापारिक स्टल रहना जनाइल बा ।
प्रदेशके ९ जिल्लाके भेषभुषा, रितिरिवाज, चालचलनहे समेट्ना मेरके लग्ना महोत्सवमे करिव ५० लाख खर्च हुइना अनुमान करल अध्यक्ष देवकोटा बटैलै । महोत्सवहे १ लाख दर्शक अवलोकन कैना अनुमान करल जनाइल बा ।
१३ दिनसम सञ्चालन हुइना महोत्सवमे १ से डेढ करोड रकम बराबरके कारोबार हुइना अपेक्षा करल बा । महोत्सव अवधिभर सुरक्षा व्यवस्थामे कडाई कैना अत्तरिया उद्योग वाणिज्य संघके महासचिव यज्ञराज जोशी बटैलै ।
इहे संगे कोरोना महामारीहे मध्यनजर कैटी स्वास्थ्य सुरक्षामे फेन बिषेश ध्यान डेना उहाँ बटैलै । महोत्सव हेरक लाग सर्वसाधारणके लाग ५० ओ विद्यार्थीनके लाग ४० रुपैया टिकट कायम करल बा ।
ओस्टके महोत्सवमे शारीरिक रुपमे अपांगता रहल ओ जेष्ठ नागरिकहे भर निःशुल्क प्रवेश कराजैना जनाइल बा । महोत्सव सकारे १० बजेसे साझँ ५ बजेसम सञ्चालन हुइना बा ।
