प्रधानमन्त्री कपके सेमिफाईनल शनिच्चरः के मारी बाजी ?

पहुरा समाचारदाता
धनगढी, ९ पुस । सुदुरपश्चिम प्रदेशके अस्थायी राजधानी धनगढीमे जारी प्रधानमन्त्री कप महिला राष्ट्रिय क्रिकेट प्रतियोगिताके सेमिफाईनल शनिबार हुइटी बा । शनिच्चर हुइना पहिल सेमीफाईनलमे प्रदेश १ ओ सुदूरपश्चिम प्रदेश प्रतिस्पर्धा करही । दुसरा सेमीफाईनलमे विभागीय टीम एपिएफ ओ लुम्बिनी प्रदेश खेल्ही । पुस ३ गतेसे सुरु हुइल प्रतियोगितामे अँटवार फाईनलसंगे समापन हुई ।

अब्बल प्रदेश १ हे रोक्न सुदूरपश्चिमहे कर्रा

जारी प्रतियोगितामे प्रदेश १ अब्बल टीमके रुपमे रहल बा । बलिङ ओ ब्याटिङमे उत्कृष्ट प्रवेश करटी रहल प्रदेश १ हे रोक्न सुदूरपश्चिमहे हम्मेहम्मे हुई । नेपाली राष्ट्रिय महिला टीमके कप्तान रुविना क्षेत्रीके अनुभव ओ परिपक्कतासे सुदूरपश्चिमके टीमहे फाईनल पुग्न मुस्किल हुई । प्रतियोगितामे हालसम चार ठो अर्धशतक बनल बटै । जेम्ने तीन ठो अर्धशतक प्रदेश १ के खेलाडी बनैले बटै ।

प्रदेश १ के अप्सरी वेगम उत्कृष्ट लयमे रहल बटी । प्रतियोगितामे तीन खेलेबेर उहाँ उत्कष्ट व्याटिङके नमुना डेखैले बटै । दुई खेलमे लगातार अर्धशतक बनाइल उहाँ लिग चरणके टिसरा खेलमेफे ४४ रनके अविजित पारी खेल्ले बटै । उहाँ सबसे ढेर रन बनैना खेलाडीके पहिल नम्बरमे रहल बटी । उहाँ तीन खेलेबेर एक सय ५६ रन जोरले बटै । सर्वाधिक रन बनैना खेलाडीके दुसरा नम्बरमे प्रदेश १ के कप्तान रुविना क्षेत्री रहल बटी । उहाँ एक अर्धशतक सहित ९२ रन बनैले बटै ।

प्रदेश १ से प्रतियोगिताके सर्वाधिक भारी स्कोरफे बनैले बा । सर्वाधिक १६६ रन प्रदेश १ से बनाइबेर और दुई खेलमेफे समान ११४ रन बनैले बा । ब्याटिङसंगे प्रदेश १ से बलिङफे उत्कृष्ट प्रदर्शन करले बा । प्रतियोगिताके सबसे फराकिलो एक सय ६० रनके जित दर्ता करेबेर प्रदेश १ से कर्णाली प्रदेशहे ६ रनमे अलआउट करल रहे । बलिङमेफे प्रदेश १ के अलिशा खाडिया सर्वाधिक विकेट लेना खेलाडीके पहिल नम्बरमे रहल बटी । उहाँ ३ खेलमे ८ विकेट लेले बटी ।

विकेट लेहुइयाके सुचीमे छैठांै नम्बरमे रहल कप्तान रुविना क्षेत्रीफे ४ विकेट लेले बटै ।
ब्याटिङ ओ बलिङमे लय डेखल प्रदेश १ हे रोक्न सुदूरपश्चिमहे घरेलु मैदान ओ घरेलु दर्शकके फाईदा हुई । यी आघे मेयर कपमेफे सेमीफाईनलमे प्रदेश १ हे हराइल सुदूरपश्चिम उच्च मनोबलके साथ मैदान उटरी । लिग चरणके अन्तिम खेलमे प्रदेश २ विरुद्ध सुदुरपश्चिमसे एक सय ४३ रन बनाइबेर ब्याटिङ सुधरटी गै बा ।

यी योगफल प्रतियोगिताके ससर्वाधिक टिसरा भारी स्कोर हो । प्रतियोगितामे अर्धशतक बनैना टिसरा खेलाडी सुदूरपश्चिमके विन्दु रावल रहल बटी । उहाँ लय लौटनाफे सुदुरपश्चिमके लाग फाईदा हुई । अपन पहिल खेलमे गण्डकीहे ३२ रनमे आउट करल सुदुरपश्चिमके बलिङफे कमजोर नइहो । सर्वाधिक विकेट लेना खेलाडीके सुचीमे सुदूरपश्चिमके कविता जोशी टिसरा नम्बरमे रहल बटै । उहाँ तीन खेलमे ६ विकेट लेले बटै । लक्ष्मी साउँद जैसिन युवा खेलाडीसे सुदुरपश्चिमसे लाभ लेके सेक्ही । मने तिव्र गतिके बलर कविता कुँवर घाहिल हुके सुदुरपश्चिमहे समस्या परी । सुदुरपश्चिमसे अघिल्का खेलमे विगारल फिल्डिङ सुधर्नाफे चुके नइपरल ।

प्रदेश १ समुह ए के विजेता हो । उ लिग चरणके तीनु खेलमे शत प्रतिशत जित हासिल करले बा । सुदुरपश्चिम प्रदेश समुह बी के उपविजेता हो । उ एपिएफसंग ८९ रनके हार व्यहोरेबेर दुई खेलमे भर सानदार जित हासिल करल रहे । चिरपरिचित खेलमे के बाजी मारी खेललपाछेक नतिजासे पत्ता हुई ।

एपिएफहे लुम्बिनी प्रदेशके चुनौती

शनिच्चर हुइना दुसरा सेमिफाईनलमे विभागीय टीम एपिएफहे लुम्बिनी प्रदेशसे चुनौती दि । एपिएफफे बलिङ ओ ब्याटिङमे अब्बल रहल बा । एक खेलाडी नइचल्के दुसर खेलाडी एपिएफके पारी उकस्टी रहल बा ।

जारी प्रतियोगितामे एफिएफसे प्रतियोगिताके सर्वाधिक दुसरा भारी एक सय ५० रनके स्कोर बनैले बा । पहिल खेलमे ९८ रन बनाइल एपिएफसे दुसरा खेलमे एक सय २८ रन बनाइल रहे । एक सय ५० रन एपिएफसे टिसरा खेलमे बनाइल हो । सर्वाधिक रन बनैना १० जाने खेलाडीहुकनके सुचीमे एपिएफके केल चार जाने खेलाडी रहल बटै । ममता चौधरी, रोमा थापा, ज्योती पाण्डेय ओ ईन्दु वर्माहे रोक्न लुम्बिनी प्रदेशहे मुस्किल परी । ब्याटिङसंगे एपिएफ बलिङमेफे बल्गर रहल बा । बल्गर टोली मन्ना सुदुरपश्चिमहे एपिएफसे ३९ रनमे समेटल बा । ओस्टेक गण्डकीहे ३३ रनमे रोक्न सफल टोलीके करुणा भण्डारी सर्वाधिक विकेट लेना खेलाडीके सुचीमे दुसरा नम्बरमे रहल बटै । उहाँ तीन खेलमे ७ विकेट लेलै ।

लुम्बिनी प्रदेशसे विभागीय टीमहे कडा टक्कर डेनामे दुई मत नइहो । कप्तान सरस्वती जिसी उत्कृष्ट लयमे रहेबेर नेरी थापाके साथसे टिमहे थप हौसला प्रदान करी । लुम्बिनीके मधु डिसी ओ सुस्मिता भुषालके कसिलो बलिङसे एपिएफहे गाहे पारे सेकी । ओइने तीन खेलमे समान ४ विकेट लेले बटै । एपिएफ समुह बी के विजेता बनेबेर तीन खेलमे जित हात परटी अविजित रहल बा । लुम्बिनी प्रदेश समुह ए के उपविजेता हो । प्रदेश १ संग हारेबेर कर्णाली ओ बल्गर वागमति प्रदेशहे हराके सेमिफाईनल पुगल हो । खेलमे के जिटी ? ओकर नतिजा दुसरा सेमिफाईनल सेकलपाछे केल पत्ता हुई ।

नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सह आयोजनामे सञ्चालन हुइटी रहल प्रतियोगिता पुस ११ गतेसम सञ्चालन हुई । प्रतियोगितामे प्रथम हुइना टिमसे ५ लाख, द्वितीयसे ३ लाख, ओम्यान अफ द सिरिज २५ हजार, बेष्ट बलरसे १५ हजार तथा बेस्ट व्याट्सओम्यानसे १५ हजार, ओम्यान अफ द म्याचसे २ हजार पुरस्कार प्राप्त करही ।