डब्लूएचआरके पाँचौैं अधिवेशन सुरु

पहुरा समाचारदाता
काठमाडौं, ९ पुस । मानव अधिकारको लागि महिला एकल महिला समूह (डब्लूएचआर) के पाँचौं अधिवेशन सुरु हुइल बा ।
काठमाडौंके बुढानीलकण्ठ नगरपालिका हात्तिगौडास्थित डब्लूएचआरके केन्द्रीय कार्यालय छहारी भवनमे शुकसे सुरु हुइल अधिवेशनसे संस्थाके नयाँ नेतृत्व चयन करी ।

अधिवेशनमे ७० से ढेर जिल्लाके २ सय ५० जाने एकल महिला सहभागी रहल अध्यक्ष कुन्दा शर्मा जानकारी डेलै । अधिवेशनके उद्घाटन सत्रमे वडका पहुना महिला बालबालिका तथा ज्येष्ठ नागरिक मन्त्री उमा रेग्मी अपनेफे एकल महिला हुइल कारण एकल महिलाके पीडा ओ मुद्दामे जानकार रहल बटैटी सेकटसम एकल महिलाके हित हुइना काम कैना प्रतिवद्धता करलै ।

कार्यक्रमके विशिष्ट पहुना राष्ट्रिय मानव अधिकार आयोगके अध्यक्ष तपबहादुर मगरसे कौनोफे एकल महिलाउप्पर महिला हुइल कारण समाज वा परिवारसे हिंसा हुई कलेसे मानव अधिकार विरोधी काम हो कहलै ।

डब्लूएचआरके संस्थापक अध्यक्ष तथा राष्ट्रिय मानव अधिकार आयोगकाके सदस्या लिली थापा टमान समस्या ओ चुनौतीके बीच एकीकृत रहल एकल महिलाहुकनके मानव अधिकार ओ आत्मसम्मानउप्पर ठेस पुग्न काम कोई कोई नइकैना आग्रह करली ।

डब्लूएचआरसे अप्ठ्यारोमे परल एकल महिलाके सहयोगके लाग तत्काल १० लाखके अक्षयकोष निर्माण करे लागल जानकारी डेटी संस्थापक अध्यक्ष थापा कोष बढैना सहयोग करडेना नेपाल सरकारलगायतहे आग्रह करलै ।
राष्ट्रिय दलित आयोगके सदस्य मिनादेवी सोव एकल महिलाके मुद्दामे सहयोग ओ सहकार्य कैना राष्ट्रिय दलित आयोग सदा तत्पर रहल बटैलै ।

कार्यक्रममे बुढानिलकण्ठ नगरपालिकाके नगर प्रमुख उद्धवप्रसाद खरेल, डब्लूएचआरके उपाध्यक्ष शोभा बिसीलगायतसे अधिवेशन सफलताके शुभकामना डेलै । कार्यक्रम शुरु हुइना आघे डब्लूएचआरके कार्यकारी निर्देशक सुमीरा श्रेष्ठ संस्थासे विधवा महिलाके हक अधिकार स्थापनाके लाग स्थापनाकालसे निर्वाह करल भूमिका सम्बन्धमे प्रदर्शनी कक्षके स्थलगत भ्रमण कराइल रहिट ।

ओस्टेक अधिवेशनके बन्द शत्रसे महासचिव सृजना श्रेष्ठसे प्रस्तुत करल संस्थाके २०७७÷२०७८ के वार्षिक प्रतिवेदनफे पास करले बा । नयाँ अध्यक्ष, उपाध्यक्ष, महासचिवलगायतके पदमे काल्ह सकारे उम्मेदवारी दर्ता कैना ओ काल्ह निर्वाचन कैना कार्यक्रम रहल निर्वाचन अधिकृत तथा अधिवक्ता श्याम श्रेष्ठ जानकारी डेलै ।