उपाधिके लाग एपिएफ ओ प्रदेश १ प्रतिस्पर्धा कैना

पहुरा समाचारदाा
धनगढी, १० पुस । सुदुरपश्चिम प्रदेशके अस्थायी राजधानी धनगढीमे जारी प्रधानमन्त्री कप महिला राष्ट्रिय क्रिकेट प्रतियोगिताके उपाधिके लाग विभागीय टीम एपिएफ ओ प्रदेश १ भिरना हुइल बटै ।

शनिच्चर फाप्ला क्रिकेट मैदानमे हुइल सेमिफाईनलमे जित हासिल करटी दुनु टोली उपाधिके लाग भिरना हुइल बटै । पहिल सेमिफाईनलमे प्रदेश १ से सुदुपश्चिम प्रदेशहे ९ विकेटसे हराइल हो कलेसे एपिएफसे लुम्बिनी प्रदेशहे ३८ रनसे पराजित करल हो ।

फाप्ला मैदानमे हुइल पहिल सेमिफाईनलमे घरेलु टोली सुदुरपश्चिम प्रदेशहे ९ विकेटसे हरैटी प्रदेश १ फाईनल पुगल बा । यी आघे सुदुरपश्चिमसंग मेयर कपके सेमिफाईनलमे व्यहोरल हारके बदला लेटी प्रदेश १ फाईनल पुगल हो । सुदुरपश्चिम प्रदेशसे डेहल ८६ रनके लक्ष्य प्रदेश १ से एक विकेट क्षतिमे भेट्टाइल । प्रदेश १ से १६ दशमलब ५ ओभरमे विजय लक्ष्य पुरा करल हो ।

पहिल विकेटके लाग ओपनरद्धय कप्तान रुविना क्षेत्री ओ काजल श्रेष्ठ ५३ रनके साझेदारी करटी सानदार जितके आधार खडा करली । अन्तिम समयसम क्रिजमे टिकल कप्तान रुविनासे अविजित ३१ रन बनैली । कविता जोशीके बलमे बोल्ड हुइल काजलसे टीमके लाग २८ रन बनैली । रुविना अप्सरी वेगमसंगफे दुसरा विकेटके लाग ३३ रनके साझेदारी करली । अप्सरीसेफे अविजित ९ रन बनैली । सुदुरपश्चिमके लाग कविता जोशी केल एक विकेट लेली ।

यी आघे सुदुरपश्चिमसे टस जिटके पहिले ब्याटिङ करटी सामान्य योगफल केल बनाइल । ७ रनमे ३ विकेट गुमाके धर्मराइल सुदुरपश्चिमसे २० ओभरमे ७ विकेट क्षतिमे ८५ रन बनाइल । सुदुरपश्चिमके लाग सम्झना खड्कासे सर्वाधिक २७ रन बनैली । कप्तान रितु कनौजिया २५ रन बनैली । ओस्टेक डल्ली भट्ट १२ रन बनैली । प्रदेश १ के लाग कप्तान रुविना क्षेत्री, अलिशा खाडिया, संगीता राई ओ ज्योती दनवारसे समान एक विकेट लेली । खेलमे प्रदेश १ के कप्तान रुविना प्लेयर अफ द म्याच हुइली ।

ओस्टेक विभागीय टीम एपिएफ प्रधानमन्त्री कप महिला राष्ट्रिय क्रिकेट प्रतियोगिताके उपाधि लग्गे पुगल बा । धनगढीके फाप्ला क्रिकेट मैदानमे हुइल दुसरा सेमिफाईनलमे लुम्बिनी प्रदेशहे ३८ रनसे हरैटी एपिएफ उपाधि लग्गे पुगल हो । टस जिटके पहिले ब्याटिङ करटी एपिएफसे २० ओभरमे ३ विकेट क्षतिमे १२९ रन बनाइल । एपिएफके लाग रोमा थापा अविजित ४२ रनके पारी खेल्ली । ओस्टेक ममता चौधरी २७ रन, सीता रानामगर १८ रन, राजमति ऐरी १४ रन ओ ज्योती पाण्डेय ११ रन ठप्ली । लुम्बिनीके लाग मधु डिसी, नेरी थापा ओ कृतिका मरासैनी समान १ विकेट लेली ।

१३० रनके विजय लक्ष्य पछ्याइल लुम्बिनी प्रदेश ९१ रन केल बनैली । निर्धारित २० ओभरमे लुम्बिनी ५ विकेट क्षतिमे ९१ रन जोरल हो । लुम्बिनीके लाग नेरी थापा अविजित ३८ रन बनैली । नितु भण्डारी १८ रन जोरली । टिसरा विकेटके लाग नेरी ओ नितु ४६ रनके साझेदारी समेत करल रहिट । एपिएफके लाग रेखा रावल ३ विकेट लेली । सीता रानामगरके नाममे एक विकेट रहल । खेलमे एपिएफके रोमा थापा प्लेयर अफ द म्याच हुइली ।

नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सह आयोजनामे सञ्चालन हुइटी रहल प्रतियोगिताके फाईनल अँटवार हुई । फाईनलमे उपाधिके लाग विभागीय टीम एपिएफ ओ प्रदेश १ प्रतिस्पर्धा करही । प्रतियोगितामे प्रथम हुइना टिम ५ लाख, दुसरा ३ लाख, ओम्यान अफ द सिरिज २५ हजार, बेष्ट बलर १५ हजार तथा बेस्ट व्याट्सओम्यानसे १५ हजार, ओम्यान अफ द म्याचसे २ हजार पुरस्कार प्राप्त करही ।