मुक्त हलियाके न्यायोचित पुनर्स्थापनाके लाग सुझाव संकलन

पहुरा समाचारदाता
धनगढी, ११ पुस । मुक्त हलियाके न्यायोचित पुनर्स्थापनाके लाग भावी रणनीति तयारी ओ यूपीआरसे करल सिफारिस कार्यान्वयनके अवस्थाबारे एक दिने प्रदेशस्तरीय सुझाव संकलन कार्यशाला धनगढीमे हुइल बा ।

राष्ट्रिय मुक्तहलिया महासंघके केन्द्रीय अध्यक्ष ईश्वर सुनारके अध्यक्षतामे हुइल कार्यक्रममे अच्छुत आचार्य हलियाहुकनके मुद्दामे यूपीआरसे करले सिफारिस कार्यान्वयनके अवस्थाबारे प्रस्तुतिकरण करले रहिट ।

मुक्तहलिया समस्या समाधानके लाग भूमि व्यवस्था सहकारी तथा गरिबी निवारण मन्त्रालयमे पेश करल सुझावपत्र प्रस्तुतीकरण तथा छलफल हरिसिंह बोहरा करल रहिट । मुक्तहलिया पुनस्र्थापनाके अवस्थाबारे जिल्लागत समुह अभ्यास प्रस्तुतिकरण ओ कार्यक्रममे समावेश चेतमान साउँद करले रहिट । उहाँ कार्यपत्रमे समावेश हुइल सक्कु विषयहे सरकारके तहगत सिफारिस कार्यपत्र निर्धारण करल बटैलै ।

कार्यक्रममे राष्ट्रिय मुक्तहलिया महासंघके केन्द्रीय सदस्य राजुराम भुल मुक्त हलियाके न्यायोचित पुनस्र्थापनाके अडान फिटलो हुइल बटैलै । कार्यक्रममे संचालन महासंघ अन्तर्गत संचालित सहास परियोजना संयोजना भुवन चुनारा ओ स्वागत मन्तव्य केन्द्रीय सदस्य मंगल सार्की करले रहिट ।

राष्ट्रिय मुक्तहलिया महासंघके केन्द्रीय अध्यक्ष ईश्वर सुनार मुक्तहलिया पुनःस्थापना हुइना बाँकी संख्या २७ सय ११ जाने रहल बटैलै । मने सरकारी तथ्याङकमे भर जम्मा ७ सय ११ जानेकेल पुनःस्थापना कैना बाँकी रहल विल्गाइल उहाँ जनैलै ।

२०६५ सालमे नेपाल सरकारसे सुरुमे लेहल तथ्याङकमे १९ हजार ५९ जाने हलिया रहलमे मन्त्रालयसे दोहारो, तेहरो नाउँ हटाके पुनः प्रमाणिकरण करेबेर २०६८/२०६९ सालमे १६ हजार ९ सय ५३ जानेक संख्या रहल बा । ओम्ने मन्से सुदूरपश्चिम प्रदेशके नौ जिल्ला ओ कर्णाली प्रदेशके ३ जिल्ला करके १२ जिल्लाके क वर्गके १८ सय ३८, ख वर्गके ३६ सय ६३, ग वर्गके ११ सय ७२ ओ घ वर्गके ७५ सय ७९ करके १४ हजार २ सय ४२ जाने परिचयपत्र पैले बटै । कलेसे दार्चुला, डडेल्धुरा, बैतडी, डोटी, बाजुरा ओ सुर्खेतके ५४ जाने मुद्दा प्रक्रियासे अर्धन्यायिक निकायसे प्रमाणित हुके परिचय प्राप्त करल महासंघके अध्यक्ष जनैले बटै ।

सुदूरपश्चिम प्रदेशके नौ जिल्ला ओ कर्णाली प्रदेशके ३ जिल्ला करके १२ जिल्लाके हालसम पुनःस्थापना हुइल संख्या १३ हजार ५ सय ४६ जाने रहलमे जग्गा खरिद ओ घर निर्माण २३ सय ४२ जाने, घर निर्माण केल करल ११ सय ९६, जग्गा केल खरिद करल ८ सय ३, घर मर्मत ८२ सय १९ जाने रहल बटै ।

प्रमाणीकरण कैना बाँकी संख्या १४ सय ९९ घरधुरी, प्रमाणिकरण हुके परिचयपत्र प्राप्त कैना बाँकी संख्या ४ सय ४१ रहल बटै । परिचयपत्र पाके पुनःस्थापना प्याकेजमे परल दुसरा किस्ता रकम पैना बाँकी रहुइयाके संख्या ११ सय ४ जाने रहल राष्ट्रिय मुक्त हलिया समाज महासंघ नेपालके अध्यक्ष सुनार बटैलै ।