घोडीघोडा ओ यूनिकबीच मर्ज अन्तिम चरणमे
पहुरा समाचारदाता
धनगढी, ११ पुस । घोडीघोडी लघुवित्त वित्तीय संस्था लिमिटेडके छैटौं वार्षिक साधारण सभा शनिबार धनगढीमे सम्पन्न हुइल बा ।
सुदूरपश्चिम प्रदेशके कञ्चनपुर जिल्लाके बेलौरी नगरपालिकामा केन्द्रीय कार्यालय रहल संस्था १० जिल्ला कार्यक्षेत्र रहल ‘घ’ वर्गके वित्तीय संस्था २०७७ असार ३ गते विधिवत उदघाटन हुके ९ ठो शाखासे सेवा डेटी आइल बा ।
छैठौ वार्षिक साधारण सभाके उदघाटन कार्यक्रममे संस्थाके अध्यक्ष प्रभातकुमार चौधरी यूनिक नेपाल लघुवित्त वित्तीय संस्थासे मर्जके हुइटी रहल ओरसे घोडीघोडी लघुवित्तके यी अन्तिम वार्षिक साधारण सभा रहल बटैलै । दुई सस्थाविच मर्ज हुके यूनिक नेपाल लघुवित्त वित्तीय संस्था लिमिटेडके रु. १ के रु १ हुइना ओ घोडीघोडाके लघुवित्त वित्तीय संस्थाके रु १ के ५० पैसा हुइना करके एक दुसरमे गँभ्ना निर्णय हुइल अध्यक्ष बटैलै ।
यूनिक नेपाल लघुवित्त वित्तीय संस्थाके शेयर पुँजी १० करोड, लगानी ३ अर्ब रहल मने घोडीघोडाके लघुवित्त वित्तीय संस्थाके शेयर पुँजी ३ करोड, लगानी ३८ करोड ४० लाख केल रहल ओरसे ओइनके १ रुप्या ओ घोडीघोडाके ५० पैसा कायय हुइल उहाँ बटैलै । घोडीघोडाके संस्थाके व्याज असुली १ करोड ३४ लाख रहल बा ।
घोडीघोडी लघुवित्त वित्तीय संस्था लिमिटेडके प्रमुख कार्यकारी अधिकृत कुन्ना नायाराण चौधरी संस्थाके प्रगतीबारे जानकारी डेहल रहिट । संस्था सोचलहस प्रगती करे नइसेकल मने एक दुई दिनके हिसाब हेरेबेर १८/१९ लाख नाफा गैल उहाँ बटैलै ।
सुरुवाटी चरणसे पुँजी कम २० करोड लगानी कैना सोच लक्ष्य रहे । ओटर लगानी करलेसेफे कहल जस्टे नाफामे जाई नइसेकगिल,’ उहाँ कहलै, लगानी करुइया ५/६ प्रतिशत व्याजडेना कहिके १२/१३ प्रतिशत पुगाइल । नेपाल राष्ट्र बैंकफे १८ प्रतिशतसे ढेर लेहे नइपैना कहिके निर्देशन जारी करल । पाछे आके १५ प्रतिशतमे झारल । एक टे पुँजीके अभाव हुइना दुसर ओर सस्तामे व्याज नइपाके उप्परके प्याजमे क्याप लगाडेहल कारण मार्जिन एकदम न्यून हुइल उहीसे कहल जस्टे नाफा कमाई नइसेकल उहाँ बटैलै ।
उहाँ कहलैं, २०७५ सालमे मौद्रिक नीति थोरिक सुधार हुइल रहे । टमान बैंकसे लगानीके लाग पैसा पैली, करिब ३०/३५ करोड लगानी कैगिल । विचमे कोभिड–१९ के कारण प्रभावित हुके गाउँघर जाई नइसेक्कल कारण संस्था नाफामे जाई नइसेकल ।
लगानी धितोसेफे सामुहिक जवानीमे डेना करल बा । कोरोनाके कारण केन्द्र बैठकमे जाइ नइकारण संस्थामे उचाईमे पुगे नइसेकल उहाँ बटैलै ।
संस्थाके लगानी असारमे ३५ करोड रहलमे अब्बे ३८ करोड पुगसेकल उहीहे हेरेबेर घाटामे नइरहल ओ विस्तारे सुधार हुइटी रहल प्रमुख कार्यकारी अधिकृत चौधरी बटैलै ।
नेपाल राष्ट्र बैंक अगहन २९ गते पत्र पठाके एक महिनाभिटर संयूक्त कारोवार कैना कहले बा । घोडीघोडाके नाउँसे काम कैना सोच उहाँ कहलै, मने ढेर संस्था मर्जरमे गैल पाछे यूनिक नेपालसे छलफल करके ओइनसे मर्जर हुई लागल हो । संस्थापक शेयर सदस्य दुर्गाप्रसाद थारु घोडीघोडा ओ यूनिक नेपाल समयमे मर्ज हुइल बटैलै ।
छैठौ वार्षिक साधारण सभा संस्थाके अध्यक्ष प्रभातकुमार चौधरीके अध्यक्षतामे हुइल रहे । स्वागत मन्तव्य संस्थाके संचालक पुरन प्रसाद चौधरी ओ संचालन कम्पनी सचिव नरेन्द्र प्रसाद लम्साल करले रहिट । कार्यक्रममे संस्थाके संचालक, संस्थापक शेयर सदस्य, संस्थाके कर्मचारीहुकनके सहभागिता रहल रहे ।
