विद्यार्थी बनैलै चार पांग्रे विद्युतीय कार

पहुरा समाचारदाता
धनगढी, ११ पुस । कैलालीके धनगढीमे रहल एक्सीस विद्याश्रमके चार जाने विद्यार्थी सारअल्फा नामक विद्युतीय चार पांग्रे कार निर्माण करले बटै ।

एक्सीस विद्या आश्रममा अध्ययनरत विद्यार्थी ऋषिकेश थापा, रोहित ऐर, आदित्य जोशी, सक्षम रेग्मी उ कार निर्माण करल हुइट ।

कोरोनाके दुसरा लहरमे जारी करल लकडाउनमे ओइने उ कार्य कैना निर्णय करले रहिट । करिब चार महिना लगाके करिब डेढ लाख लागतमे सारअल्फा नामक कार निर्माण करल ऋषीकेष थापा बटैलै ।

घर परिवार ओ विद्यालयके सहयोगसे अपनेहुक्रे उ कार निर्माण करल उहाँक कहाई बा । ‘लकडाउनहे सदुपयोग करी कना सोचसे हम्रे यी कार्य सुरु करल रहे,’ थापा कहलै, ‘यी अवधिमे ढेर समस्याफे अइलेसे उ फे हम्रे घर परिवार ओ विद्यालयसे आर्थिक सहयोग पैली । करिब चार महिना लैगैली बनैना । अब्बेफे निर्माण कार्य जारी बा ।’ कारमे चाहना सामाग्रीहुक्रे टमान ठाउँसे जुटाके कार निर्माण करल उहाँक कहाई बा ।

कक्षा १० मे अध्ययनरत विद्यार्थीहुक्रे पढाइसंगे अपनेहुकनके क्षमताहेफे बाहेर नन्ना उद्देश्यसे अपनेहुक्रे पढाईसंगसंगे यी क्षेत्रमे लागल ओइनके कहाई बा । अब्बे उ कारमे चार ठो व्याट्रीके प्रयोग करल बा । उ कारके लोड क्षमता सात क्वीन्टल रहल बा । उहीहे और गाडी जस्टे बजारमे नन्ना करके काम करटी रहल बटाइल बा ।