घोडाघोडी–१० साक्षर घोषणा
पहुरा समाचारदाता
पहलमानपुर, ११ पुस । कैलालीके घोडाघोडी नगरपालिका वडा नम्बर १० हे साक्षर वडा घोषणा करल बा ।
वडा भित्तर १५ से ६० उमेर समूहके ९५.३८ प्रतिशत ढेर जनसंख्या साक्षर रहल ओरसे वडाहे साक्षर वडा घोषणा करल नगरपालिका जनैले बा । वडाहे अँट्वारके रोज एक कार्यक्रमके बीच नगरप्रमुख ममताप्रसाद चौधरी साक्षर वडा घोषणा करलैं । वडाहे साक्षर घोषणा करटि नगरप्रमुख चौधरी नेपालहे साक्षर करैना लक्ष्यके साथ नगरपालिकाहे फेन साक्षर घोषणा कैनामे नगरपालिका लागल बटैलैं ।
कार्यक्रममे उपप्रमुख प्रेमकुमारी थापा साक्षर हुइलेसे समाजमे विद्यमान रहल छुवाछूत, महिला हिंसा, बालविवाह, लैंगिक हिंसा न्यूनीकरणमे टेवा पुग्न बटैलि । ओस्टेक, कार्यक्रममे सामुदायिक सिकाई केन्द्रके संयोजक शिवप्रसाद ढकाल समाजहे साक्षर कराइक लाग स्थानीय सरकारलगायत सक्कु सरकार, सारोकारवाला निकाय, राजनीतिक दल लागे परना बटैलैं । कान्ती राज्यलक्ष्मी माध्यमिक विद्यालयके प्रअ उमाकान्त मिश्र अपन घरे अप्नही साक्षरतामे ध्यान डेहे परना बटैलैं ।
कार्यक्रममे नगरपालिकाके प्रमुख प्रशासकीय अधिकृत खगेन्द्रबहादुर सिंह, शिक्षा शाखा प्रमुख उमेशराज रेग्मी, जनकल्याण माध्यमिक विद्यालय थेवैके प्रअ मोतीप्रसाद शर्मा, शसस्त्र प्रहरी बेस क्यापमके प्रमुख शैलेन्द्रसिंह चैसीर, पहलमानपुर प्रहरी चौकीके प्रमुख अनिल शाह, सरोकारवालाहुक्रे, शिक्षक, विद्यार्थीहुक्रेके सहभागिता रहल रहे ।
कार्यक्रम वडा नम्बर १० के वडाध्यक्ष भीमबहादुर बमके अध्यक्षतामे हुइल रहे । वडा नम्बर १० के वडा सदस्य रामप्रसाद भण्डारी स्वागत करल कार्यक्रमके सञ्चालन वडा सचिव धनीराम चौधरी करले रहैं । नगरहे साक्षर घोषणा करना अभियान अन्तर्गत यीआघे वडा नम्बर ११, १२, ३, ४, ५ ओ ९ वडाहे साक्षर वडा घोषणा करसेकल बा ।
