फूलवारीमे माघी मेला लग्ना
पहुरा समाचारदाता
धनगढी, १२ पुस । थारु समुदायके लौव बरस एवं बर्का टिहुवार माघीके अवरसमे धनगढी उपमहानगरपालिका वडा नम्बर १९ फुलवारी मेला आयोजना हुइना हुइल बा ।
माघ १ गते लहैलक दिनसे सुरु हुइना मेला माघ ५ गते सम आयोजना हुइना जनाइल बा । मेलामे टमान खेलकुद प्रतियोगिता, राष्ट्रिय तथा स्थानीय कलाकारहुक्रनके सांस्कृतिक प्रस्तुती, झाँकी, फुड स्टल रहना थारु संस्कउति टिहुवार मञ्चके अध्यक्ष पर्वत चौधरी जानकारी डेलै ।
मेलाके आवश्यक तयारी सुरु करल बा । मेला फुलवारी आधारभुत विद्यालयके अंगनामे मेला लग्ना जनाइल बा । मेलाहे भब्य ओ सभ्य तरिकासे सम्पन्न पारक लाग तमान उपसमिति फेन गठन हुइल मेला व्यवस्थापन समितिके अध्यक्ष धनकुमार चौधरी बटैलै ।
माघीके अवसरमे बाबा मन्दिरमे दर्शानार्थीहुक्रनके पुनाआजाके लाग भीड लग्ना जनाइल बा । मन्दिरके अपने धार्मिक तथा ऐतिहासिक महत्व रहल बा । यहोर माघीके अवसरमे फुलवारी युवा क्लबके आयोजनामे भलिबल प्रतियोगिताके फेन आयोजना हुइना हुइल बा ।
करिब ६ दशकसे लग्टी आइल मेला एवं मन्दिरके संरक्षण सम्बद्र्धन ओर भर कौनो निकायके आभिनसम ध्यान नाइ गैल हो ।
