छुट मुक्तकम्लरी परिचयपत्रके माग
७ हजार ८ सय ३५ जाने मुक्तकम्लरी परिचयपत्रसे वञ्चित
अनिता चौधरी
धनगढी, १३ पुस । मुक्त कमलरी विकास मञ्च छुट मुक्तकम्लरीहुक्रनके लाग स्थानीय सरकारसे परिचयपत्रके माग कैना जनैले बा ।
टीकापुर मुक्तकम्लरी नगर स्तरीय दुसरा बैठकमे सात ठो महत्वपूर्ण निर्णय करटी परिचपत्र पैनासे छुट रहल मुक्तकम्लरीहुकनके लाग स्थानीय सरकारसे परिचयके माग कैना मञ्चके जिल्ला अध्यक्ष बिन्द्रा चौधरी बटैली । आठ बरस पहिले मुक्ती घोषण हुइल कैलाली सहिट दाङके ७ हजार ८ सय ३५ जाने मुक्तकमरी सरकारी परिचयपत्र पैनासे बन्चित हुइल बटै ।
मुक्त कमलरी विकास मञ्चके तथ्यांक अनुसार कैलाली, कञ्चनपुर, बर्दिया, बाँके ओ दाङ करके पाँच जिल्लामे १२ हजार ७ सय ६९ जाने मुक्तकमलरी रहलमे अभिनसम ७ हजार ८ सय ३५ जाने मुक्तकमरी सरकारी परिचयपत्र पैनासे बन्चित रहल हुइट ।
सरकार २०७० साल असार १३ गते कमलरी मुक्तीके घोषणा करल रहे । पूर्व भूमि सुधार तथा व्यवस्थामन्त्री गोपाल दहित मुक्तीके घोषित जिल्लाके २९ जनहनहे मुक्तकमलरी हुकन २०७४ साल भदौ १६ गतेसे बर्दियासे पहिचानसहितके परिचयपत्र वितरणके वितरण सुरु करल रहिट ।
पूर्वमन्त्री दहित सरकारसे मुक्तकमलरीहे परिचयपत्र वितरणके काम बिना रोकावट आघे बह्रैटी चार महिनाभिटर सेक्ना निर्देशनफे डेहल रहिट । मने अभिन पाँच जिल्लाके ७ हजार ८ सय ३५ जाने मुक्तकमरी सरकारी परिचयपत्र पैनासे बन्चित हुइना दुःखद बाट रहल मुक्तकमलरी विकास मञ्च कैलालीके अध्यक्ष चौधरी बटैली ।
मुक्तकमलरी विकास मञ्चके तथ्याङक अनुसार सरकारी परिचयपत्र पैनासे बन्चित रहलमे कैलालीमे १५ सय ७४ जाने, बर्दियामे २९ सय ५३, बाँकेमे ३ सय ४३, कञ्चनपुरमे ८ सय ५जाने ओ दाङमे २१ सय ६० जाने रहल बटै । कलेसे सरकारी परिचयपत्र पाइलमे कैलालीमे २५ सय जाने, कञ्चनपुरमे ३ सय ६२ जाने बर्दियामे २ सय ५० जाने, बाँकेमे ३ सय २४, ओ दाङमे १४ सय ९८ जाने रहल बटै ।
जिल्ला अध्यक्ष चौधरीके अनुसार पाँच जिल्लामे १२ हजार ७ सय ६९ जाने मुक्तकमलरी रहलमे जम्मा ४ हजार ९ सय ३४ जाने केल सरकारी परिचयपत्र पैले बटै । कैलालीमे मुक्तकमलरीके संख्या ४ हजार ७४, कञ्चनपुरमे ११ सय ६७, बर्दियामे ३२ सय ३, बाँकेमे ६ सय ६७ ओ दाङमे ३६ सय ५८ जाने रहल उहाँ जनैली ।
ओस्टेक मञ्चके बैठकमे अध्यनरत मुक्त कम्लरीहुकनके लाग स्थानीय सरकारसे छात्रवृत्तीके माग कैना, स्थानीय सरकार ओ वडा स्तरसे सीपमुलक तालिमके माग कैना, कम्प्युटर डिप्लोमासमके माग कैना, लोकसेवा तयारी कक्षाके माग कैना ओ आयआर्जन सम्बन्धी तालिम माग कैना ओ प्राविधिक शिक्षाके माग कैना निर्णय करल रहे । दुसरा साधारणसभा कार्यक्रम सिर्जना चौधरीके अध्यक्षतामे हुइल रहे ।
