सुदूरपश्चिमके पहाडी जिल्लामे वर्षासँगे हिमपात
पहुरा समाचारदाता
धनगढी, १४ पुस । सुदूरपश्चिमके पहाडी जिल्लामे वर्षासँगे हिमपात हुइल बा । मंगरके रातसे सुदूरपश्चिमके हिमाली ओ उच्च पहाडी क्षेत्रमे हिमपातसँगे वर्षा हुइल बा ।
डडेल्धुराके गन्यापधुरा गाउँपालिकाके हगुल्टे, बैतडीके अनारखोली, खोड्पे, सतबाँझ, श्रीभाबर, बजपानीलगायतके क्षेत्रमे जोरसे हिमपात हुइल स्थानीय बटैले बाटै ।
सुदूरपश्चिम प्रदेश ट्राफिक प्रहरी कार्यालय अत्तरियाके अनुसार हिमपातपाछे भीमदत्त राजमार्ग अन्तरगत डडेल्धुराके हगुल्टेमे ओ दशरथ चन्द राजमार्ग अन्तरगत बैतडीके खोड्पेमे यातायात सेवा अवरुद्ध हुइल बा । हिउँ पर्ना क्रम नैरोकलपाछे सडक खुलाइ नैसेकल प्रहरी जनैले बा । जिल्ला प्रहरी कार्यालय डडेल्धुराके अनुसार राजमार्ग खुलैना प्रयास हुइटी रहलेसे जोरसे परल हिउँके कारण समस्या हुइल बा ।
बाजुरा, बझाङ, डोटी, दार्चुलाके हिमाली ओ उच्च पहाडी क्षेत्रमे फेन हिमपात हुइलपाछे जाड बह्रल बा । जुरार बह्रके जनजीवन कष्टकर हुइल बा ।
पहाडी जिल्लामे किल नैहोके मंगरके रात कैलाली ओ कञ्चनपुरके टमान स्थानमे वर्षा हुइलपाछे जुरार बह्रल बा । जाडसे वृद्धवृद्धा ओ बालबालिका प्रभावित हुइ सेक्ना कहटी चिकित्सक ख्याल रख्ना आग्रह करले बाटै ।
