पुस १५ गते धनगढीमे डिलाईट साँस्कृतिक साँझ, तयारी पुरा
पहुरा समाचारदाता
धनगढी, १४ पुस । सुदूरपश्चिम प्रदेशके परम्परागत पर्व पुसे १५ के अवसर पारके धनगढीमे डिलाईट साँस्कृतिक साँझ २०७८ कार्यक्रम हुइना हुइल बा ।
‘सुपके कला संस्कृतिके जगेर्ना ओ मौलिक भेषभुषा खानपानके व्यवसायीकरणके साथे आन्तरिक पर्यटनमे लगानी’ कना मूलनारा सहित हुइना सांस्कृतिक साँझके तयारी पुरा हुइल जनाइल बा । बुधके धनगढीमे पत्रकार सम्मेलन कैके कार्यक्रमके तयारी पुरा हुइल जनाइल हो ।
इ क्षेत्रके भाषा, कला, संस्कृति स्थानीय खानपान ओ आन्तरिक पर्यटनहे प्रवद्र्धन कैना उद्देश्य सहित कार्यक्रम आयोजना करे लागल आयोजक डिलाइट साँझके संयोजक आवेश कुमार चन्द बटैलै । डिलाइट क्याफेके सञ्चालक समेत रहल चन्द मौलिक खानपिनहे व्यवसायीकरण कैके रोजगार सृजना कैना, इ प्रदेशके भाषा संस्कृति तथा गीतके बोली संग सरोकार रख्ना चीजबस्तुके संग्रह कैके संग्रहालयके लाग पहल कैना कार्यक्रमके मुख्य उद्देश्य रहल बटैलै ।
डिलाइट क्याफेके आयोजनामे हुइना कार्यक्रममे टमान कलाकारके प्रस्तुती ओ थारु टेलिफिल्म ‘अस्टे कर्बो’ के च्यारिटी शो समेत हुइना जनाइल बा ।
साँस्कृतिक साँझमे गायिका अन्नु चौधरीके बेजोड प्रस्तुति सँगे चर्चित थारु कलाकार नायक संगत थारु, थारु लोक गायक राजु चौधरी, सुनिता दहित, रितु चौधरी ओ मधु चौधरी लगायतके कलाकारके विशेष प्रस्तुति रहना आयोजक जनैले बा ।
यकर साथे कलाकारिता क्षेत्रमे योगदान पुगाइल विविध क्षेत्रके १५ जनहनहे सम्मान पत्र ओ दोसल्ला सहित सम्मान फेन करजैना जनाइल बा । धनगढीके नवजीवन अस्तपताल पाछे द रिद्धिसिद्धी पार्टी प्यालेसमे हुइना कार्यक्रमके लाग टिकट दर रु.१५ सय निर्धारण करल बा । कार्यक्रममे २ जनहनहे खाना सहितके व्यवस्था रहना आयोजक जनैले बा । कार्यक्रम साँझ ५ बजेसे रात १० बजेसम सञ्चालन हुइना जनाइल बा ।
