मुक्तकम्लरीनके पुनर्स्थापन
परिचयपत्र पाइल मुक्त कम्लरीनसरकार छात्रवृत्ति लगायटके सुविधा डेहठ । मने बहुट मुक्त कम्लरीन अभिनसम परिचयपत्रपैना छुटल बटाँ । इहे क्रममे मुक्त कमलरी विकास मञ्च मुक्त कम्लरीनके लाग स्थानीय सरकारसे परिचयपत्रके माग कैना जनैले बा ।
सरकारसे २०७० साल असार १३ गते कमलरी मुक्तिके घोसना कैगैल रहे । मुक्त कमलरी विकास मञ्चके तथ्यांकअनुसार ५ जिल्लामे १२ हजार ७ सय ६९ जाने मुक्तकमलरी रहलमे अभिनसम ७ हजार ८ सय ३५ जाने सरकारी परिचयपत्र पैनासे बन्चित बाटैं । इ बहुट बरा संख्या हो ।
मुक्त कमलरी विकास मञ्चके अम्हिक्के कैलालीमे बैठल बैठकमे पह्रटि रहल मुक्त कम्लरीनके लाग स्थानीय सरकारसे छात्रवृत्तिके माग कैना कहिगैल बा । ओस्टक स्थानीय सरकार ओ वडास्तरसे सीपमुलक तालिम, कम्प्युटर डिप्लोमासमके छात्रवृत्ति, लोकसेवा तयारी कक्षा, आयआर्जन सम्बन्धि तालिम ओ प्राविधिक शिक्षाके माग कैना निर्णय कैगैल बा ।
मुक्त कमलरी विकास मञ्चके छाता टरे कमलरीन् गोलबद्ध बाटैं । मञ्च अपन ओर्से सहकारी चलैनासे लेके मेरमेरिक छलफल, गोस्ठि टि बा । मने सरकारी सहयोगके प्राथमिकता ओंए नै पैले हुइट । सरकारसे थारु समुदायके लग छुट्याजैना लोकसेवाके कोटा अभिन सुनिश्चित नै हुइल हो । असिनमे कमलरीन् महिला कोटासे जो लोकसेवा लरे पर्ना बाध्यता बटिन । परिचयपत्रके आधारमे थरुहटके स्थानीय निकाय कम्टिमे कमलरी लगायत महिलन् सरकारी कामकाजमे उच्च प्राथमिकता डेहक चाहि । ओस्टक मुक्त कमलरीन किल नाहि, कमैया परिवारके आउर सदस्य फेन सरकारी कामकाजम प्राथमिकता पाइक चाहि ।
देश संघियतामे गैसेकलमे ओकर अनुभुति कमैया, कमलरी, दलित, पिछडा वर्ग लगायत समुह फेन पाइक चाहि । ओइनहे न्याय डेहैना प्राथमिकता डेना मेरिक कार्यक्रम स्थानिय निकायन हालिसे हालि लानिट ।
