धनगढीमे निर्वाचन अधिकृतके कार्यालय उद्घाटन

पहुरा समाचारदाता
धनगढी, १५ पुस । कैलालीके धनगढीमे निर्वाचन अधिकृतके कार्यालय बिफेक रोज उद्घाटन करल बा ।
इहे माघ १२ गतेसे हुइ जैटी रहल राष्ट्रियसभा निर्वाचनके लाग कार्यालयके उद्घाटन करल हो । एक समारोहके बीच जिल्ला न्यायाधीश तथा निर्वाचन अधिकृत जयानन्द पनेरु डोरी तानके कार्यालय उद्घाटन करल रहिट ।

२०७४ सालके निर्वाचन प्रदेशके डोटी जिल्लामे करल रहे । इ बरस भर निर्वाचन आयोगसे धनगढीमे कैना निर्णय करल रहे ।

उ अवसरमे बोल्टी अधिकृत पनेरु मतदाता नामावली प्रकाशन होसेकलपाछे निर्वाचन प्रक्रिया आघे बह्रना बटैलै । ओहकान अनुसार इहे १७ गते मतदाता नामावली प्रकाशन कैना ओ उम्मेदवारी दर्ता प्रक्रिया आघे बह्राजैना बा ।

सुदूरपश्चिम प्रदेशमे तीन पदके लाग निर्वाचन हुइना बा । प्रदेशमे एक महिला, दलित ओ अन्य पदके लाग निर्वाचन हुइना बा । निर्वाचन अधिकृत पनेरु धनगढीस्थित प्रदेशसभा सचिवालयमे दुईठो मतदानकेन्द्र स्थापना कैके मतदान कराजैना बटैलै । ओकर लाग एक मतदानकेन्द्रमे तीनठो मतपेटिका राखजैना बा ।

तीन पदके लाग प्रदेशसभा सदस्य ५२ जाने ओ स्थानीय तहके प्रमुख तथा उपप्रमुख एक सय ७५ जाने कैके दुई सय २७ जाने मतदाता रहल बाटै । प्रदेशमा नेपाली कांग्रेस, नेकपा एमाले, नेकपा माओवादी केन्द्र, एकीकृत समाजवादी, जनता समाजवादी पार्टी ओ लोकतान्त्रिक समाजवादी पार्टीके जनप्रतिनिधि रहल बाटै ।