पुसे पर्वके मुख्यमन्त्री भट्टसे शुभकामना
पहुरा समाचारदाता
धनगढी, १५ पुस । पुसे पर्वके अवसरमे सुदूरपश्चिम प्रदेशके मुख्यमन्त्री त्रिलोचन भट्ट प्रदेशवासीके नाउँमे शुभकामना सन्देश डेले बाटै ।
मुख्यमन्त्री भट्ट सन्देशमे कहले बाटै–‘सुदूरपश्चिम प्रदेश कला संस्कृतिके धनि रहल ओरसे हमार परम्परागत रितिरिवाजके सकारात्मक पक्षके संरक्षण ओ नव युवा वर्गमे हस्तान्तण कैना सामुहिक प्रयास आवश्यक रहठ् ।’ उहाँ आघे कहले बाटै– ‘इ अवसरमे प्रदेशबासी सक्कु जनहनहे शुभकामना ब्यक्त करटुँ ।’
कैलाली, कञ्चनपुर लगायत सुदूरपश्चिम प्रदेशके पहाडी जिल्लामे पुसे १५ पर्व बिफेक रोज हर्षोल्लासपूर्वक मनागैल बा । मौलिक पहिचान बोकल पुसे १५ पर्वहे एकआपसमे दन्ते कथा सुनैना ओ सुन्ना पर्वके रूपमे लेना करजाइठ् ।
पर्वके अवसरमे गाउँघर तथा टोलमे एकआपसमे भेला होके आगी तापके रातभर जाग्राम बैठ्ना, तरुल, कन्दमूल, पिँडालु लगायत उसिनके खैना परम्परा रहल बा । ओस्टके लाउन, बाबर, माणा, निसौसे लगायत स्थानीय खानाके मीठामीठा पकवान समेत पकाके खैना चलन रहल बा । गाउँघरके वृद्धवृद्धासे फेन लोक तथा दन्ते कथा सुन्ना रीतिरिवाज रहल बा ।
विशेष कैके रातभर जाग्राम बैठके पुसे १५ पर्व मनैना परम्परा रहलेसे फेन आजकल भर समय परिवर्तनसंगे फरकपनाके साथ फेन इ पर्व मनाइ लागल बा । इ पर्वमे विवाहित छाइचेलीनहे लहेरमे बोलाके सत्कार फेन करजाइठ् ।
