नमस्ते सहकारीके १९औ साधारणसभा

पहुरा समाचारदाता
धनगढी,१८ पुस । नमस्ते बचत तथा ऋण सहकारी संस्था लिमिटेडके १९औं साधारणसभ कार्यक्रम शनिच्चरके रोज एक कार्यक्रमके विच भव्यताके साथ सम्पन्न हुइल बा ।

धनगढी उपमहानगरपालिकाके नगर प्रमुख नृपबहादुर वड नमस्ते सहकारीके १९औ साधारणसभाके उदघाटन करल रहिट । उ अवसरमे नगर प्रमुख वड यी समाजमे रहल पिछरल वर्ग, आदिबासी जनजाती, महिला, बालबालिका ओ दलित समुदायके आघे बह्रैना सहकारीसे प्रत्यत्ना नइकरटसम सुन्दर, विकसित समाज बने नइसेक्ना बटैलै ।

नमस्ते सहकारी पिछरल वर्ग समुदायहे आघे बह्रैना भारी भूमिका खेल्ले बा,’ उहाँ कहलै, ‘पिछरल कम्जोर मनै, आर्थिक व्यवस्था करे नइसेकल व्यक्तिहे आघे बह्रैना यकर भारी योगदान बा । नगरपालिका सक्कुहुनके घर घरमे सहाकारी जोरना प्रतिबद्धता अनुसार आघे बह्रल बा । सहकारीसे सक्कुहुनके हो । हमार हो हमार घरके हो । हरेक क्षेत्रके आवश्यकता पुरा कैना संस्था कलेक सहकारी हो ।’
उहाँ कहलै, ‘पिछरल समुदाय अब्बे बैंकमे जाई नइसेकल, पहुँच नइरहल अवस्था बा । पहिले बैंकसे ऋण निकारेबेर विश्वास कैना अवस्था नइरहे । अब्बे सहकारीसे २०÷३० लाख रुप्या निकारे सेक्ना अवस्था बा ।’

यी सहकारीहे धनगढीमे केल नाही प्रदेशभर संचालन कैना उहाँ आग्रह करलै । सहकारीके हरेक नागरिकके पहुँच पुगैना जरुरी रहल बटैलै । यी सहकारीहे सुपथ मोलके पसल संचालन कैना उहाँ आग्रह करलै । साथे निर्वाचनमे नइजाके सर्व सम्मतसे नयाँ कार्यसमिति चयन कैना जरुरी रहल उहाँ बटैलै ।

धनगढी उपमहानगरपालिका–८ के अध्यक्ष नारायण बराल यी सहकारी जिल्लामे टिसरा स्थानमे रहल बटैलै । छोट समयमे भारी प्रगति करल कहटी वडासे करे सेक्ना सहयोग कैना उहाँ प्रतिवद्धता जनैलै ।

वडा–७ के अध्यक्ष सिताराम राना थारु समुदायमे महाजानी प्रथाहे सहकारी संस्था विस्थापित करल बटैलै । पिछरल समुदायहे आघे बह्राइक लाग सहकारीके भारी योगदान करल कहटी शेयर सदस्यहुकनहे व्यावसयिक लोन लेके उत्पादनशिल क्षेत्रमे लगानी कैना बटैलै ।
नवजीवन सहकारी संस्थाके संस्थापक सदस्य तथा पूर्व मेयर खेमराज पाण्डे जिल्लामे अपन संस्था आघे बह्रल मने नमस्तेफे ओकर पछपछही आइल बटैलै । नमस्ते सहकारी छोट समयमे मजा प्रगति करल कहटी शेयर सदस्यहुकनके पैसा सुरक्षित हुइल बटैलै ।
सस्थाके पहिल अध्यक्ष प्रभातकुमार चौधरी डेढ लाखसे सुरुवाट करल संस्था अब्बे आर्थिक क्रान्तिके डगरओर लम्कटी ३२ करोड ऋण प्रवाह कैना सफल ओ करिब ३ करोड शेयर पुँजी पुगैना सफल हुइल बटैलै ।

संस्थाके पूर्व कार्यवाहक अध्यक्ष दिलबहादुर चौधरी शेयर सदस्यहुकनके सहयोग विना संस्था चले नइसेक्ना बटैलै । उदघाटन शत्र संस्थाके अध्यक्ष जगतराम चौधरीके अध्यक्षमे हुइल रहे । कार्यक्रममे उहाँ संस्थापक सदस्य, शेयर सदस्यहुकनके सहयोगमे यहाँसम पुगल बटैलै । कार्यक्रममे स्वागत मन्तव्य उपाध्यक्ष रोहित चौधरी ओ संचालन संस्थाके सचिव जीवन चौधरी करले रहिट ।

उहे अवसरमे असल बचतकर्ता, उत्कृत समुह ओ मजा कार्य करल कहटी कर्मचारीहुकन सम्मान कैगिल रहे । सम्मानित हुइलमे कर्मचारीमे कनिष्ठ सहायक रेखा चौधरी, बजार प्रतिनिधि प्रेमवती राना, कार्यालय सहयोगी किसन चौधरी रहल बटै । असल महिला केन्द्रमे बेली महिला केन्द्र, नौलो विहानी महिला केन्द्र, संगिन महिला केन्द्र, गुराँस महिला केन्द्र, अग्रासन महिला केन्द्र, कृष्णा महिला केन्द्र, गुन्जा महिला केन्द्र रहल बटै ।

ओस्टेक असल ऋणीमे केवल राना, राम चौधरी, कालिराम डगौंरा रहल बटै । ओस्टेक असल बचतकर्तामे भीम बहादुर चौधरी, पुल्हुराम चौधरी, कमल राना, सुवसनी चौधरी ओ सुजित डगौंरा रहल बटै । ओस्टेक पहुनाहुकनहे मायाके चिनो प्रदान कैगिल रहे । उहीसे आघे संस्थाके नवनिर्मित भवनके उदघाटन नगरप्रमुख नृप बहादुर वड रिवन काटके करल रहिट ।

ओस्टेक संस्थाके बन्दशत्रमे संस्थाके अध्यक्ष जगतराम चौधरी बार्षिक प्रतिवेदन, लेखा समिति संयोजक रामदास चौधरी आन्तरिक लेखापरीक्षण प्रतिवेदन प्रस्तुत करले रहिट । ओस्टेक बन्द शत्रमे उठल जिज्ञाशा तथा अइना दिनके लक्ष्यबारे संस्थाके प्रवन्धक विजय चौधरी करले रहिट ।

सहकारीसे ५० करोड ४१ लाख ६१ हजार निक्षेप संकलन

नमस्ते बचत तथा ऋण सहकारी संस्था लिमिटेड असार मसान्तसम ५० करोड ४१ लाख ६१ हजार ६ सय ४६ रुप्या निक्षेप संकलन कैले बा ।
सहकारीके १९औं बार्षिक साधारणसभामे संस्थाके अध्यक्ष जगतराम चौधरी २०७८ असार मसान्तसम ५० करोड ४१ लाख ६१ हजार ६ सय ४६ रुप्या निक्षेप संकलन करल बटैले । ओस्टेक पाँच महिनामे (अगहन समान्तसम) २४ करोड ९१ लाख २१ हजार २ सय ६१ रुप्या निक्षेप संकलन हुइल उहाँ बटैलै ।

सस्थाके निक्षेपमे बाँकी रहल रकम गैल बर्षके तुलनामे ३९. ६९ प्रतिशत वृद्धि हुके असार मसान्तसम १९ करोड ८२ लाख ३० हजार ३ सय ७७ रुप्या पुगल अध्यक्ष बटैलै । गैल बरष निक्षेपमे बाँकी १४ करोड १९ लाख ६ हजार ४ सय ८५ रुप्या रहल उहाँ जनैलै ।
संस्थाके अधिकृत शेयर पुँजी रु आठ करोठ रहलमे २०७७ सालके असार मसान्तसम्म चुक्ता शेयर पुँजी रु २ करोड २६ लाख ७८ हजार ३ सय मन्से २९. ०९ प्रतिशत बृद्धि हुके २०७८ असार मसान्तसम चुक्ता शेयर पुँजी रु २ करोड ९२ लाख ७७ हजार २ सय पुगल अध्यक्ष बटैलै । २०७७ साल असार मसान्तसम शेयर सदस्य संख्या ५२ सय २९ जाने रहलमे २०७८ असार मसान्तसम शेयर सदस्य संख्या ५७ सय २३ जाने पुगल उहाँ बटैलै । कलेसे अगहन महिनासम ५८ सय ७२ जाने पुगल बटै ।

संस्थाके २०७७ के असार मसान्तसमके लगानीमे रहल कर्जा रकम रु २४ करोड ९३ लाख २२ हजार ४ सय २९ रुप्या ६१ पैसा रहलमे आर्थिक बर्ष २०७७÷२०७८ मे ३१.२३ प्रतिशतसे वृद्धि हुके २०७८ साल असार मसान्तसम्म लगानीमे रहल कर्जा रु ३२ करोड ७१ लाख ९४ हजार ९ सय ३७ रुप्या २६ पैसा रहल संस्था जनैले बा । भाखा नाघल रकम २०७८ असार मसान्तसम १.८५ प्रतिशतके सीमा कायम रहल जनाइल बा ।
नमस्ते सहकारी १२.५० प्रतिशत लाभांश डेना नमस्ते बचत ऋण सहकारी संस्था लिमिटेड अपन शेयर सदस्यहुकानहे अशौसे १२.५० प्रतिशत लाभांश डेना जनैले । सहकारीके क्षेत्रमे भारी फडको मरटी धनगढी उपमहानगरपालिका–१ रहल उ सहकारी आशौसे अपन शेयर सदस्यहुकनहे लाभांश डेहे लागल हो । शेयर लगानी करके शेयरसे लगानी करल उचित प्रतिफल पाइ सेकिट कना उद्देश्यसे यी बरस २०७७ साल असारमसान्तसम सदस्यता लेके शेयर दर्ता हुइल शेयर ुसदस्यहुकनहे प्रति शेयर १२.५० प्रतिशत शेयर लाभांश वितरण कैना यी आर्थिक बर्षके नाफासे रु २८ लाख ८६ हजार २ सय ८३ रुप्या २१ पैसा सम्मानित सक्कु शेयर सदस्यहुकनहे बोनस शेयरके लाग प्रस्ताव करल कैगिल अध्यक्ष जनैलै । यी सहकारीमे १९ जाने कर्मचारी तथा ९ जाने बजार प्रतिनिधि कार्यरत बटै कलेसे १०० ठो लघुवित्तके केन्द्रसे सेवा डेटी रहल बा ।

संस्थाके आर्थिक बर्ष २०७७÷२०७८ मे हुइल प्रगति

२०६६ साल अगहन २७ गते विधिवत दर्ता हुइल नमस्ते बचत ऋण सहकारी संस्था लिमिटेड १३ बर्ष पुराके १४ औं बर्षमे प्रवेश करेबेर आर्थिक बर्ष २०७७÷२०७८ मे अपने भवन निर्माण करके लौव भवनसे सेवा सुविधा डेना सुरु करले बा । करले बा कलेसे नवनिर्मित भवनके उदघाटनभर शनिच्चर के करल बा ।

आर्थिक बर्ष २०७७÷२०७८ सालमे संस्थासे विनियम संशोधन करके सम्बन्धित निकायसे प्रमाणित करके लागु करके बा । कर्मचारी नियमावली २०६५ हे संशोधन करके सम्बन्धित निकायसे प्रमाणित करके हुइल, बचत व्यवस्थापन कार्यविधि संशोधन हुके लागु हुइल, कर्मचारी दक्षता तथा वृति विकासके लाग तालिम संचालन करल, शेयर सदस्यहुकनहे काजक्रिया खर्च, सुत्केरी पोषण भत्ताखर्च निरन्तर डेटी आइल संस्था जनैले बा । संस्था विगतमे साविका धनगढी नगरपालिकाके १४ ठो वडामे कार्यक्षेत्र संचालन करलमे हाल धनगढी उपमहानगरपालिकाके १९ वडामे कार्यक्षेत्र विस्तार करटी सेवा सुविधा डेटी रहल बा ।

संस्थाके आर्थिक बर्ष २०७८÷२०७९ के लक्ष्य

संस्थाके कार्यक्षेत्र सुदूरपश्चिमके सक्कु स्थानीय तहमे विस्तार कैना, संस्थाके स्वीकृत सेवा शाखा संचालन कैना, सहकारी शिक्षाके व्यापक प्रचारप्रसार कैना, कार्यालय संचालन कार्यविधि तयार कैना, कर्मचारीके वृति विकास तालिम संचालन कैना, टमान कोष व्यवस्थापन तथा वितरण कार्यविधि, बचत तथा ऋण शिर्षक थप व्याजदर संशोधन कैना सहकारी जनैले बा । ओस्टेक विनियम २०६५ हे संशोधन तथा पुर्नलेखन कैना सहकारी जनैले बा ।