थप २१३ मे कोरोना संक्रमण पुष्टि, २ के मृत्यु

काठमाडौं, १८ पुस । बिटल २४ घण्टामे नेपालमे २१३ जहनमे कोरोना संक्रमण पुष्टि हुइल बा । देशके टमान प्रयोगशालामे करल ५ हजार ९६२ परीक्षणमे २१३ जहनमे संक्रमण पुष्टि हुइल स्वास्थ्य तथा जनसंख्या मन्त्रालय अँट्वारके रोज जनैले बा ।

ओस्टेक, १ हजार ६६९ जहनके एन्टिजेन परीक्षण करलमे ३ जहनमे संक्रमण डेखाइल बा । पीसीआर ओ एन्टिजेन विधिसे करल ७ हजार ६३१ परीक्षणमे २१६ जहनमे कोभिड संक्रमण पुष्टि हुइल मन्त्रालय जनैले बा । पीसीआर परीक्षणमे हालसम ८ लाख २८ हजार ९८६ जाने संक्रमित हुइल बटैं ।

२४ घण्टामे २०९ जाने संक्रमणमुक्त हुइल बटैं । यी सँगे ठिक हुइनाके संख्या ८ लाख १२ हजार ४१९ पुगल बा ।

पछिल्का २४ घण्टामे कोभिड संक्रमणसे २ जहनके मृत्यु हुइल बा । कोरोनासे हालसम ११ हजार ५९८ जहनके मृत्यु हुइल बा । सक्रिय संक्रमित संख्या ४ हजार ९७१ जाने बटैं ।