कैलारी जातीय छुवाछूतमुक्त घोषणाके तयारी
पहुरा समाचारदाता
धनगढी, १८ पुस । कैलालीके कैलारी गाउँपालिकाहे जातीय छुवाछूत तथा विभेदमुक्त गाउँपालिका घोषणाके तयारी हुइल बा ।
उ गाउँपालिकामे तुलनात्मक रुपमे जातीय विभेद न्यून रहल जातीय छुवाछूत तथा विभेदमुक्त गाउँपालिका घोषणा करना तयारी हो । पुस २४ गते एक कार्यक्रम कैके गाउँपालिकाहे जातीय छुवाछूत तथा विभेदमुक्त गाउँपालिका घोषणा करना जनागिल बा ।
यिहेबीच, जातीय छुवाछूत तथा विभेदमुक्त गाउँपालिका घोषणाके लाग अँट्वार गाउँपालिकास्तरीय अन्तरक्रिया करल बा । कैलारी गाउँपालिका, दलित महिला अधिकार मञ्चके संयुक्त आयोजना ओ डीसीएके सहयोगमे अन्तरक्रिया कार्यक्रम करल हो ।
कैलारी गाउँपालिकाके उपाध्यक्ष लक्ष्मी सत्गौंवाके अध्यक्षतामे हुइल कार्यक्रममे अधिवक्ता बालाराम भट्टराई कैलारी गाउँपालिकामे जातीय विभेदके सवालमे करल अध्ययनसे प्राप्त नतिजा प्रस्तुत करल रहे । उ क्रममे उहाँ ९७ प्रतिशत थारु समुदायके बसोबास रहल कैलारीमे जातीय विभेद कम रहल बटैलैं ।
कार्यक्रममे कैलारी गाउँपालिकाके उपाध्यक्ष सत्गौंवा जातीय छुवाछूत ओ विभेदरहित समाज बनैना चिन्तन, सोंच परिवर्तन करना आवश्यक रहल बटैलि । उहाँ विभेद अन्त्यके लाग जनचेतना फैलैना आवश्यक रहल उल्लेख करटि कलि– ‘दलित समुदायहे आत्मनिर्भर बनाइ परठ । उहाँहुकनके मागके आधारमे कार्यक्रम लैजिना विषयमे गाउँपालि लागल बा ।’
उहाँ जातीय छुवाछूत तथा विभेदमुक्त समाज निर्माणके लाग जनप्रतिनिधि ओ कर्मचारी लागकेकिल नैहुइना उल्लेख करटि सब एकजुट होके लग्ना आवश्यक रहल बटैलि । कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल, दलित महिला अधिकार मञ्चके निर्देशक सावित्रा घिमिरे, दीपक सुनार लगायत मन्तव्य व्यक्त करले रहैं ।
कार्यक्रममे वडाध्यक्षहुक्रे कैलाशपसाद चौधरी, कमलप्रसाद चौधरी, भिखराम चौधरी, बालकृष्ण चौधरी, सन्तु चौधरी, प्रेम चौधरी, विष्णुप्रसाद चौधरी, गाउँपालिकाके गाउँसभा सदस्य, दलित समुदायके प्रतिनिधि लगायतके उपस्थिति रहल रहे ।
