माओवादी अध्यक्षमे फेनसे दाहाल
काठमाडौं, १९ पुस । नेकपा माओवादी केन्द्रके सम्पन्न ८ औं महाधिवेशनपाछे बैठल केन्द्रीय कमिटी बैठकसे अध्यक्षमे पुष्पकमल दाहाल निर्वाचित हुइल बटैं । सोम्मार ललितपुरमे बैठल पहिल बैठकमे नेता नारायणकाजी श्रेष्ठसे करल प्रस्तावमे कृष्णबहादुर महरा समर्थन जनैले रहैं ।
हलहे सम्बोधन करटि दिनानाथ शर्मा दाहाल सर्वसम्मतसे निर्वाचित हुइल घोषणा करले रहैं । नवनिर्वाचित केन्द्रीय सदस्यहुकनके शपथग्रहणसँगे नेता श्रेष्ठ दाहालहे अध्यक्षमे नाम प्रस्ताव करले रहैं ।
अँट्वारके रोज दाहाल नवनिर्वाचित केन्द्रीय सदस्यहुकनके नामावली पह्रके सुनाइलसँगे आठौं महाधिवेशन सम्पन्न हुइल हो । यीसँगे दाहाल ३ दशकसे लम्मा समयसे माओवादीके नेतृत्वमे रहटिआइल बटैं ।
अध्यक्षमे निर्वाचित हुइलपाछे उहाँ अप्ने महत्वपूर्ण अवस्थामे पार्टीके नेतृत्व करना अवसर पाइल प्रतिक्रिया डेले बटैं ।
माओवादीमे एक अध्यक्ष, एक वरिष्ठ उपाध्यक्ष, छ उपाध्यक्ष, एक महासचिव, दुई उपमहासचिव, तीन सचिव ओ एक कोषाध्यक्ष रहना व्यवस्था बा ।
पुस २५ के बैठकसे अन्य पदाधिकारी टुंगो लगैना
नेकपा माओवादी केन्द्रके पहिल केन्द्रीय कमिटीके बैठक पुष्पकमल दाहालहे अध्यक्षमे चयन करटि स्थगित हुइल बा ।
औरे बैठक पुस २५ गते बैठना बटागिल बा । माओवादी केन्द्रके ८ औं महाधिवेशनसे केन्द्रीय समितिके चयन करले रहे । सोम्मारके बैठकसे अध्यक्षमे दाहाल चयन हुइलेसे फेन पदाधिकारीहुकनके भर टुंगो लागल नैहो ।
बाँकी केन्द्रीय सदस्य ओ पदाधिकारीके टुंगो २५ गतेके बैठक लगैना कृष्णबहादुर महरा जानकारी डेले बटैं । सोम्मार नेता नारायणकाजी श्रेष्ठके प्रस्ताव ओ कृष्णबहादुर महराके समर्थनमे दाहाल सर्वसम्मतसे चयन हुइल हुइटैं ।
