सफलताके लाग संघर्षः युवाहुकनहे उत्प्रेरणा कार्यक्रम
पहुरा समाचारदाता
राजापुर, १९ पुस । युनिक नेपाल दोसरचो युवाहुकनके लाग उत्प्रेरणा कार्यक्रम करले बा । उ कार्यक्रम अमर शहिद बहुमुखी क्याम्पसके विद्यार्थीहुकनके लाग करल हो ।
कार्यक्रममे ‘जीवनका वक्र रेखाहरु’ पुस्तकके लेखिका बालिका चौधरी अपन भोगल जिन्दगीके कठिनाई, करल संघर्षके साथे उहिनसे प्राप्त सफलताके बारेमे सहभागीहुकन माझ प्रस्तुत करले रहि । उहाँ अपने पह्राइक लाग निरन्तर पारिवारिक संघर्ष करे परलेसे फेन कबु हरेस नैखाइल बटैलि ।
साथे एकचो अप्ने आत्महत्या करनासमके निर्णयमे पुगल रलेसे फेन अइसिन करलेसे सब बाट कहाँ डेखे ओ भोगे पाजाइ कहिके रुकल बटैलि । लेखिका कलि, यदि यी घटना हुइट कलेसे अप्ने समाजके लाग अत्रा महत्वपूर्ण समय लगानी करे नैपिैनो, अत्रा सुन्दर संसारमे जिएनैपैना ओ यी पुस्तक फेन नैलिखजैना रहे कटि सहभागी युवाहुकनहे जीवनप्रतिके महत्व बह्रैले रहि ।
कार्यक्रममे प्रमुख अतिथि अमर शहिद बहुमुखी क्याम्पसके क्याम्पस प्रमुख अनिलदत्त चौधरी युवाहुकनके लाग अइसिन कार्यक्रम अत्यत्न उपयोगी रहल ओरसे क्याम्पसमे नियमित अइसिन कार्यक्रमके लाग सुझाव डेलैं ।
कार्यक्रममे युनिक नेपालके अध्यक्ष प्रिमबहादुर थारु युनिक नेपाल युवाहुकनके सकारात्मक सोंच बनैना, युवाशक्तिहे सहि मार्ग निर्देशन करना ओ युवा सशक्तिकरणके लाग अपन नीति तथा कार्यक्रममे जोड डेहल बटैलैं । कार्यक्रमके सञ्चालन स्ववियु सभापति दिलिप रत्गैंया करले रहैं ।
