थप ३५५ मे कोरोना संक्रमण पुष्टि, ३ के मृत्यु

काठमाडौं, २० पुस । बिटल २४ घण्टामे नेपालमे ३५५ जहनमे कोरोना संक्रमण पुष्टि हुइल बा । देशके टमान प्रयोगशालामे करल ७ हजार ७९४ परीक्षणमे ३५५ जहनमे संक्रमण पुष्टि हुइल स्वास्थ्य तथा जनसंख्या मन्त्रालय मंगरके रोज जनैले बा ।

ओस्टेक १ हजार ५३५ जहनके एन्टिजेन परीक्षणमे ३८ जहनमे संक्रमण डेखाइल बा । पीसीआर ओ एन्टिजेन विधिसे करल ९ हजार ३२९ परीक्षणसे ३९३ जहनमे कोभिड संक्रमण पुष्टि हुइल मन्त्रालय जनैले बा । पीसीआर परीक्षणमे हालसम ८ लाख २९ हजार ६३२ जाने संक्रमित हुइल बटैं ।

२४ घण्टामे २६३ जाने संक्रमणमुक्त हुइल बटैं । यी सँगे ठिक हुइनाके संख्या ८ लाख १२ हजार ९३७ पुगल बा ।

पाछेक २४ घण्टामे कोभिड संक्रमणसे ३ जहनके मृत्यु हुइल बा । कोरोनासे हालसम ११ हजार ६०१ जहनके मृत्यु हुइल बा । सक्रिय संक्रमित संख्या ५ हजार ९४ जाने बटैं ।