७ दिने आधारभूत पत्रकारिता तालिम सुरु
पहुरा समाचारदाता
धनगढी, २० पुस । गोदावरी नगरपालिका–२, अत्तरियामे मंगरके रोजसे सात दिने आधारभूत पत्रकारिता तालिम सुरु हुइल बा । गोदावरी पत्रकार मञ्चके आयोजनामे हुइल तालिमके गोदावरी नगरपालिकाके नगरप्रमुख हरिसिंह साउँद उद्घाटन करलैं ।
उद्घाटन करटि नगरप्रमुख साउँद पत्रकारिताके माध्यामसे विपन्न, गरिबहुकनके आवाज बुलन्द हुइटिरहल बटैलैं । गोदावरीमे पत्रकारिताहुकनके संख्या बह्राइक लाग टरेक तहसे पह्रैना स्थानीय सरकारपहल करना उहाँ प्रतिवद्धता व्यक्त करलैं ।
ओस्टेक, कार्यक्रममे दुर्गालक्ष्मी विद्यालयके प्राचार्य क्याम्पस प्रमुख शिवराज जोशी यी मेरिक तालिमसे पत्रकारितामे किल नैहोके अन्य ठाउँमे फेन काम लग्ना बटैलैं । कार्यक्रममे नेपाल पत्रकार महासंघ कैलालीके सदस्य कैलाश जोशी तालिमसे पत्रकारितामे रुचि रहल हुकनके लाग मजा अवसर रहल बटैलैं ।
पद्मा अस्पाताल प्रालिके प्रशासक मञ्जु साउँद आधारभूत तालिमसे प्रशिक्षार्थीहुकनके क्षमता अभिवृद्धिमे टेवा पुग्ना विश्वास व्यक्त करलि । उ अवसरमे मञ्जुहे आयोजक संस्था गोदावरी पत्रकार मञ्च सम्मान समेत करले बा ।
तालिमके प्रशिक्षक उपप्रध्यापक तथा साहित्यकार डा. टिएन जोशी, नेपाल पत्रकार महासंघ सुदूरपश्चिमके सचिव हरि जोशी, आर्थिक क्षेत्रमे कलम चलैटि रहल वीरेन्द भट्ट, मञ्चके अध्यक्ष हेमराज भट्ट, गोपाल सुवेदी बटैं ।
मञ्चके अध्यक्ष हेमराज भट्टके अध्यक्षतामे हुइल कार्यक्रममे स्वागत उपाध्यक्ष प्रेम विष्ट करले रहैं । मञ्चके सचिव नरेशनाथ योगी कार्यक्रमके सञ्चालन करले रहैं । कार्यक्रममे दुर्गा लक्ष्मी ओ एभरेष्ट स्कूलके ५० जाने ढेर विद्यार्थीहुकनके सहभागिता रहल बटैं ।
