समुदायके अगुवासंग बालविवाह न्यूनीकरणबारे अन्तरक्रिया
पहुरा समाचारदाता
बर्दिया, २० पुस । राजापुर नगरपालिकाके वडा नं. २ जोतपुर गाउँके समुदायके अगुवाहुकनसंग बालविवाह न्यूनीकरण सम्बन्धी अन्तरक्रिया सम्पन्न करल बा । युनिक नेपालके आयोजनामे सम्पन्न कार्यक्रममे बालविवाह हुइनाके कारण, यिहीसे हुइना समस्या ओ समाधानके उपायबारे समेत छलफल करल रहे ।
अनतरक्रिया कार्यक्रममे बालविवाह हुइनाके कारण, उहीसे उत्पन्न समस्या ओ समुदायसे यकर समाधानके उपाय खोजल रहे । सहभागीहुकन बिच छलफल करेबेर अभिभावकहुक्रे अपन जिम्मेवारी बहन करे नइसेक्ना, अभिभावकहुक्रनमे असल अभिभावकत्वके विकास नइहुइना ओ बालबालिकाहुक्रे आधुनिक प्रविधिके दुरुपयोग कैना बालविवाह हुइल बटैलै ।
गाउँमे कोई बालविवाह करसे बरघर समितिसे जरिवाना टोक्न बाट बरघर समितिके सचिव पूर्ण थारु बटैलै । यकर लाग आबके नयाँ बरघर समितिमे निर्णय करे पर्ना बटैलै ।
कार्यक्रमके समापन करटी युनिक नेपालके सचिव निर्मला चौधरी सक्कु अभिभावकहुक्रे अपन बालबालिकाहुकनके भविष्यके बारेमे चासो धारे पर्ना बटैलै । साथे, मोर लर्का का करटटै कना ख्याल करे पर्ना बटैलै । कार्यक्रमके सहजीकरण युनिक नेपालके कार्यक्रम अधिकृत सोम डेमनडौरा करले रहिट ।
