अतिरिक्त क्रियाकलापमे विद्यार्थीनके आकर्षण
पहुरा समाचारदाता
धनगढी, २१ पुस । जानकी माध्यमिक विद्यालय बनकट्टाके विद्यार्थी विज्ञानप्रति रुचि रख्ठै । उहाँहुक्रे विज्ञान सम्बन्धित टमान सामग्री बनाके प्रदर्शन कैटी आइल बाटै ।
ओस्टके, श्री सरस्वती माध्यमिक विद्याय खरुवाखेराके विद्यार्थी पाककलामे पोख्त बाटै । कक्षा ८ मे पह्रुइया विद्यार्थी टमान खानाके परिकार अपनहे बनाके स्वाद चिखैना करल बाटै । इ टे केवल प्रतिनिधि विद्यालय किल हो । इ विद्यालयमे जस्टे कैलालीके औरे सरकारी विद्यालयमे फेन विद्यार्थीनके आकर्षण अतिरिक्त क्रियाकलापप्रति बह्रल बा ।
अध्ययनसंगे व्यवहारिक ज्ञान हासिलके लाग अतिरिक्त क्रियाकलापमे उहाँहुक्रे सहभागिता बह्रटी गैल बा । किताबमे पह्रल अनुसार विगतमे विद्यार्थीनहे अतिरिक्त क्रियाकलापके माध्यमसे व्यवहारिक ज्ञान सिकैना परिपाटी कम रहे । पाछेक समय पठनपाठन शैलीहे आउर फराकिलो बनैटी विद्यालयसे अतिरिक्त क्रियाकलापमे जोड डेहे लागल बाटै ।
अतिरिक्त क्रियाकलाप करेबर व्यवहारिक रुपमे कुछ लावा चीज सिखजैना करल कैलारी गाउँपालिका–८ पृथ्वीपुरस्थित लक्ष्मी माध्यमिक विद्यालय कक्षा १२ मे अध्ययनरत मानदेवकुमार चौधरी बटैलै । उहाँ टमान अन्नके प्रयोग कैके टमान चिजके चित्र बनैना करल बाटै । चाउर, दाल, मकै, धान, भट्मास, लाही प्रयोग कैके कुछ दिन आघे नेपालके नक्सा ओ झन्डा बनाके चौधरी प्रदर्शनीमे राखल रहिट ।
‘विद्यालयके सरहुक्रनके सल्लाहके आधारमे मै नक्सा, झण्डा बनाइल हुइटुँ,’ उहाँ कहलै, ‘अइसीक नौलो तरिकासे नेपालके नक्सा ओ झण्डा बनाइबर महिन फेन खुशी लागल बा ।’ विद्यार्थी किताब घोकके किल नैहुइठ् । बाहिरी ज्ञानके लाग उहाँहुक्रे अतिरिक्त क्रियाकलापमे फेन ध्यान डेहे परठ् । अभ्यास जत्रा हुइठ्, उहाँहुक्रनमे निखारपन फेन ओत्रे नै हुइठ् । विद्यार्थीके लाग पाक कला फेन एकठो महत्वपूर्ण अतिरिक्त क्रियाकलाप हो ।
सरस्वती माध्यमिक विद्यालय खरुवाखेराके कक्षा ८ मे अध्ययनरत विद्यार्थी परिकार पकैनामे निपुण बाटै । उहाँहुक्रे आपन संस्कृति अनुसारके खानाके परिकार पकैना करल बाटै । ‘घरमे डाइहे सेलरोटी पकाइल डेखल रहुँ,’ विद्यार्थी रीमा लुइँटेल कहली, ‘ओहे डेखके मै फेन पकैना करल बाटुँ ।’ ओस्टके, उहे कक्षामे अध्ययनरत बिना चौधरी ढिक्री बनैना करठी । ढिक्री थारु समुदायके माघमे खैना सबसे महत्वपूर्ण परिकार हो ।
विद्यालयमे कौनो विशेष कार्यक्रम हुइल बेला अपनेहुक्रे खाइक लाग परिकार पकैना करल विद्यार्थीनके कहाइ बा ।
विज्ञान प्रदर्शनी, टमान विद्युतीय सामग्री निर्माण लगायतके क्रियाकलाप फेन सरकारी विद्यालयमे बह्रल बावै । इ मेरके गतिविधि निजी विद्यालयमे ढिउर हुइना करल अपने सुन्टी आइलमे आब सरकारी विद्यालयके विद्यार्थी फेन इ कार्यमे ढिउर आघे बह्रसेकल कैलारी गाउँपालिका–५ स्थित जनकल्याण माध्यमिक विद्यालय कक्षा १० मे अध्ययनरत राजन चौधरीके कहाइ बा ।
‘मै फेन ड्रोन बनाके उडैना करल बाटुँ,’ एक प्रदर्शनीमे आपन बनाइल ड्रोन प्रदर्शन कैटी उहाँ कहलै, ‘आब सरकारी विद्यालयके विद्यार्थी फेन कुहीसे कम नैहुइटी ।’ विद्यार्थी आँखीसे डेखल चीज अपनहे अभ्यास कैके व्यवहारमे लागू करेबर उहाँहुक्रनके सिकाइ उपलब्धी बह्रना करल शिक्षकहुक्रनके बुझाइ रहल बा ।
‘जबसम उहाँहुक्रे अपने अभ्यास नैकरही तबसम नैसिख्ही,’ जनता माध्यमिक विद्यालय गदरियामे कार्यरत शिक्षक डिल्लीराम मिश्र कहलै, ‘सिखक लाग आब सरकारी विद्यालयके विद्यार्थी कुहीसे कम नैहुइट ।’
उहाँ सरकारी विद्यालयमे अध्ययनरत विद्यार्थी अपनहे कैके खैना मेरके विद्यार्थी रहल उल्लेख करलै । जनता माध्यमिक विद्यालय लग्गे प्रसिद्ध कोइलही टल्वा परठ् । उ विद्यालयके कक्षा ९ से १२ समके विद्यार्थी टमान सामग्रीके प्रयोगसे कोइलही टल्वा ओ ओम्ने मिनीपार्क बनाके प्रदर्शनी कैना करल बाटै ।
